Prezidente Bankada CNRT, Arão Noe de Jesus Amaral hateten, bankada simu husi prezidente CNRT horisehik (Kuarta, (18/10)), via telefone katak, kuandu buat hotu mak la’o tuir konstituisaun, laiha ema ida mak kestiona tanba nasaun ne’e Estadu Direitu Demokrátiku.

“Maun boot sira hakarak kontaktu malu ba ami laiha buat ida. Maibé, servisu ne'ebé ami hala’o bazeia ba orientasaun partidu nian, no mós hetan kontaktu permante ho prezidente partidu CNRT,” dehan nia, iha Uma Fukun PN, horisehik.

Tuir nia, bankada ne’e reprezenta partidu no halo polítika partidu nian. Ne’e duni saida mak halo durante ne’e mai husi orientasaun partidu nian.

Nune’e, to’o ohin loron bankada kontinua simu orientasaun partidu nian liu husi Konsellu Polítika Nasionál (CPN).

Entretantu Programa VII Governu Konstitusionál automatikamente la pasa, hafoin deputadu bloku AMP ne’ebé kompostu husi partidu CNRT, PLP no KHUNTO hatama mosaun rejeisaun ba programa ne’e.

Votasaun ba mosaun rejeisaun programa VII Governu Konstitusionál deputadu husi Bloku AMP afavór ho totál 35 no deputadu bloku koligasaun FRETILIN no PD vota kontra ho votu 30.

Ho rezultadu votasaun ne’e, automatikamente programa VII Governu Konstitusionál nian la pasa, nune’e governu bele aprezenta tan dala ida.

Maski nune’e, liu husi aprezentasaun ne’e, Primeiru Ministru, Mari Alkatiri, deklara abertamente katak sei la fila mai iha Uma Fukun Parlamentu Nasionál.

Nune’e, nia mós sei lori fali programa ne’e hodi aprezenta ba povu diretamente, hodi bele hatudu katak programa ne’e tuir duni nesesidade povu nian ka deputadu sira ne'ebé hanaran-aan reprezentante povu vota programa ne’e ho ódiu vingansa.

Ne’e duni, posibilidade sei hakat ba iha eleisaun antesipada. Maski nune’e, desizaun sei fila fali ba Prezidente Repúblika hodi bele foti desizaun kona-ba destinu funsionamentu órgaun ezekutivu nian ba oin.