Deklarasaun ne’e Ministériu Finansas hasai liu-husi Xefe Gabinete Komunikasaun no Informasaun, Agostinho Castro, hodi rejeita informasaun ne’ebé publika husi diáriu INDEPENDENTE ho títulu “Governu kontrata arguida Emília Pires sai asesora MF”.

Nia esplika, bainhira Emília Pires remata hanesan Ministra Finansas iha V Governu Konstitusionál, kontinua kontrata nu’udar asesora ba área reforma no jestaun desempeña iha VI Governu Konstitusionál, lideradu husi eis-Primeiru Ministru, Rui Maria de Araújo.

Kontratu ne’ebé Ministériu Finansas halo ba eis-Ministra Emília Pires inisia loron 8 Juñu 2015, nune’e iha 2016 Emília Pires rasik rezigna-aan hanesan asesora, ne’ebé la asume kargu asesora iha Ministériu Finansas, liu husi karta rezignasaun ne’ebé hato’o iha 13 Dezembru 2016.

“Eis-Ministra Finansas oras ne’e la asume ona kualkér pozisaun iha Ministériu Finansas, hanesan informasaun ne’ebé fó sai iha Diáriu INDEPEDENTE ne’ebé publika, iha Segunda, 10 Setembru tinan ne’e”, dehan Agostinho, liu husi deklarasaun ba imprensa iha edifísiu MF, Ai-Tarak Laran, horisehik.

Nune’e, Ministériu Finansas deklara katak, durante ne’e la halo pagamentu ba Emília Pires nu’udar eis-titulár hafoin prosesu kazu ne’e tama ba tribunál.

Antes ne’e, Ministra Finansas Interina, Sarah Lobo Brites, hataan ba pergunta jornalista sira nian kona-ba pagamentu eis-titulár sira iha ezekusaun Orsamentu Jerál Estadu (OJE) 2018 nian, inklui mós ba Eis-Ministra Finansas, Emília Pires, nia dehan, pagamentu ba Emília Pires nian suspende hela dezde inísiu kazu ne’e rejista iha tribunál.

“Emília Pires iha direitu ba ida ne’e (pensaun vitalisia), maibé ultimamente hanesan ita boot sira hatene, nia fo hela asesoria ba Ministeriu Finansas entaun nia simu nia osan hanesan asesora. Nia la simu osan hanesan eis-titulár”, dehan Ministra.