Sira ne’ebé iha hanoin hanesan maka Prezidente Repúblika, Francisco Guterres Lú Olo, Primeiru Ministru, Taur Matan Ruak no Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur.

Xefe Estadu, Francisco Guterres Lú Olo hateten, konsensu polítiku ne’e dalan ne’ebé di’ak atu hetan solusaun ba situasaun polítika agora, importante maka lider hotu-hotu loke vontade atu halo diálogu.

“Hotu-hotu tenke loke nia vontade para atu halo diálogu”, dehan nia, hafoin partisipa remata kampaña kuda ai-horis, iha área São Paulo II Tasi Tolu, Sesta (25/1).

Demokrasia la'ós povu hili de’it atu hetan maioria ka minoria. Demokrasia aplika loron-loron iha ibun ko’alia ba malu atu rezolve problema povu nian.

Konsensu Solusaun Úniku

Entretantu, Xefe Estadu Maiór F-FDTL, Majór Jenerál Lere Anan Timur husu ba lider sira hotu atu iha konsensu hodi rezolve impase polítika ne’ebé la'o tinan rua ona.

Kestaun boot liu ne’ebé lider másimu iha instituisaun Forsa Defeza ne’e haree la’ós tanba Prezidente Repúblika veta OJE 2019, maibé vontade lider istóriku sira nian to’o agora la hatudu konsensu polítiku ne’ebé di’ak ba malu.

“Ha’u haree kestaun boot liu mak konsensu polítika entre ita nia lider sira”, tenik nia, hafoin partisipa kampaña kuda ai-horis, iha Tasi Tolu, Sesta (25/1).

Maski nune’e, nia mós konsidera katak, kuandu OJE ne’e Prezidente kontinua veta Governu difisil atu moris ho orsamentu duadesimu inklui F-FDTL rasik.

Maibé, hanesan Instituisaun Defeza, lakohi atu ezije labele hakarak buat di’ak de’it, ida aat ne’e hasees aan tiha.

“Ita labele hein de’it situasaun di’ak de’it, kuandu situasaun aat ita hakiduk ona”, dehan nia.

Antes ne’e, Primeiru Ministru, Taur Matan Ruak, apoiu konsensu polítika entre partidu polítiku sira nu’udar dalan oinsá atu solusiona impase polítika ne’ebé la’o daudaun iha rai laran.

“Ha’u Primeiru Ministru dispozisaun ba Prezidente Repúblika saida mak Prezidente Repúblika hanoin atu halo ba oin ha’u apoiu. Inisiativa hotu-hotu inklui diálogu no konsensu,” dehan nia.

Maibé, Xefe Governu hanoin oinsá mak OJE 2019 ne’e bele mai fali iha Prezidente Repúblika, ne’e mak hanesan atividade urjente atu labele dada nasaun ne’e ho duodésimu de’it hodi prezudika atividade tomak.

Tanba ne’e, Xefe Governu ninia hanoin oinsá maka apoiu malu, no tuir fali rezolve problema orsamentu atu labele prezudika.