Xefe Estadu dehan, opozisaun hakarak hamonu VII Governu ne’e, maibé prosesu naruk no komplikadu tebes. Mezmu nune’e, Prezidente Repúblika sei foti desizaun tuir dalan legál.
Lú-Olo hateten, kuandu Governu monu arbiru sente ladún di'ak, bainhira Governu ida sa’e kuandu la tuir dalan konstituisaun prontu Prezidente Repúblika tenke foti desizaun tuir Lei.
Ne’e duni, Xefe Estadu husu ba deputadu husi bloku Aliansa Maioria Parlamentár (AMP), atu labele ‘hanoin aat’ ba Governu, maibé oinsá servisu hamutuk hodi rezolve situasaun ne’ebé akontese hela.
“Ha'u husu ba deputadu sira katak servisu hamutuk atu lori ita nia Governu ne’e ba oin, liu husi ita boot (opozisaun) sira nia hanoin atu hadi'a buat sira ne’e hotu”, dehan PR Taur, iha Suai-Kovalima, Segunda (27/11).
Nia dehan, Prezidente Repúblika nia desizaun ikus maka tenke tuir dalan Konstituisaun, sei la foti desizaun arbiru, nia pozisaun tuir lei.
Xefe Estadu dehan, dala ida tan diálogu maka laiha desizaun Prezidente Repúblika tenke foti desizaun tuir lei, atu nune’e garante estabilidade nasionál.
Desizaun ikus maka Prezidente Repúblika iha kompeténsia atu labele hakat liu Konstituisaun, tanba tenke hakru'uk ba Lei.
Maski nune’e, antes ne’e, bloku AMP liu husi ida-idak nia bankada deklara katak sira laiha intensaun aat ba VII Governu Konstitusionál, maibé haree katak meiu ne’ebé uza mak la tuir dalan legál no la nesesáriu.
Membru bloku AMP husi Bankada PLP, deputadu Juvinal Mericio Akara, antes ne'e hateten, sira simu ona pareser tékniku kona-ba Orsamentu Retifikativu nian atu debate urjénsia ka normál. Maibé, depois Komisaun haree no diskute ba pontu sira ne'ebé iha buat balun la urjénsia.
Nia fó ezemplu, alokasaun osan ba estrutura foun governu nian, selu dívida ba Timor Telekom, sosa travo eletrisidade. Ne’e ladún urjente atu deside no aprova agora.
Nune’e, Prezidente Bankada KHUNTO, Luis Roberto hatete, dívida sira ne'ebé governu anteriór halo hanesan ospitál ne'ebé seidauk selu ne’e sei iha osan atu, tanba ne’e la presiza osan retifikativu.
Iha sorin seluk, Bankada CNRT foti pozisaun katak, proposta Orsamentu Retifikativu ba Parlamentu Nasionál ho intensaun atu husu tan osan hodi responde ba nesesidade ne'ebé iha. Maibé, bloku AMP rejeita atu halo diskusaun tanba konsidera atu ne’e hanesan asaltu ba Konstituisaun.
Bazeia ba anotasaun Konstituisaun artigu 109 katak, enkuantu Governu nia programa seidauk pasa, maka laiha dalan ba Governu atu submete Proposta Lei Orsamentu.
Tanba ne’e, kuandu OR rejeita signifika Governu kontinua uza OJE 2017 to’o fulan Dezembru no kontinua ho orsamentu dua-désimu hodi hein OJE 2018. OR so bele utiliza to’o fulan Dezembru 2017 de’it, labele liu períodu ida ne'e, tanba tinan finanseiru maka Janeiru-Dezembru.
