Ko-Prezidente Troika Lere Anan Timur hateten, Fretilin tenke hatene halibur ema hotu-hotu hamutuk uma lisan no uma lulik Fretilin atu ukun nasaun ida-ne'e ba oin.

“Liu-liu imi nia lideransa no imi nian aman sira, imi nian aman ida mak tuur iha ne'ebá Sekretáriu Jerál Marí, imi nia aman ida mak Ramos Horta, agora Prezidente Repúblika,imi nia aman ida mak Xanana, imi nia aman ida mak Taur. Ami iha Baukau ha'u dehan Avo Xanana sira dehan aih Xanana la'ós ami nia avo, ha'u dehan hanesan nee labele, se avo buan ona mós ita nia aman, ita-nia aman ona, atu oan sai fali aman ne'e difisil, ne'e Timor nia kultura la hanesan ne'e,” dehan nia, iha Suku Letefoho, Postu Admimistrativu Same, Sabádu (22/4).

Nia fundamenta, biar nia iha partidu ida mais avo nafatin iha partidu ne'ebé de'it, maibé respeitu nafatin sira, tanba sira mak funda nasaun ida ne’e.

“Imi-nia avó no aman Marí Sekretáriu Jerál ne'e Fretilin, atu iha partidu ne'ebé mós ne'e o nia aman nafatin o dehan la'ós o nia aman o nega esforsu ne'ebé hala'o durante tinan 24. Ami sei iha ne'e, ami sei moris, se ohin loron imi la konsidera ami kuantu mais aban-bainrua imi de'it, imi sei oho malu,” nia informa.

Nia akresenta, entaun Fretilin la sai ona, símbolu unidade nasionál, maibé Fretilin sai divizionismu, sai ezemplu oho malu, sai ezemplu diskrimina malu.

“Tanba ne'e husu jerasaun foun sa'e sira imi nia aman, imi nian aman nafatin, imi nia líder imi nia líder nafatin, labele nu'udar oan, hau nia aman ida ne'e di'ak liu, ha'u nia aman ne'e la diak, diak liu aman sira iha problema karik, aih Apa sira nia problema, ami oan sira labele hatama ami nia kanoru tohar, ida-ne'e mak dehan katak Fretilin tenke marka diferénsia,” nia relata.

Iha fatin hanesan, Sekretáriu Jerál Fretilin, Marí Alkatiri hateten, Xanana nia luta hotu-hotu hatene.

“Ita labele nega, aban-bainrua nia fila mai Fretilin imi hotu bele hadomi nia,” dehan nia.