Deputada Bankada CNRT, Albina Marçal hatete, ró feri Haksolok sai polémika boot iha sosiedade Timor nia leet tanba progresu husi obra ne’e laiha ona informasaun kontinuidade.
“Ró haksolok ne’ebé ba konstrui iha Portugál ne’e uluk dehan sei mai iha 2017, maibé to’o agora ne’e tanba saida”, dehan nia, iha Uma Fukun PN.
Tanba ne’e, Prezidente Autoridade RAEOA, Mari Alkatiri, klarifika ba públiku atu hatene loloos paradeiru ró feri ne’e rasik.
Tuir nia, atu halo konstrusaun ba Ró Haksolok ne’e Konsellu Ministru mak halo rezolusaun hodi fó servisu ba Governu sentrál ezekuta.
“Rezolusaun ne’e halo iha 2014 maibé to’o fali 2015 laiha implementasaun maka Primeiru Ministru, Xanana Gusmão, ami na’in rua halo akordu transfere ba RAEOA atu ezekuta, maibé kuandu ami ezekuta kontratu entre kompañia ne’ebé agora problema ona ne’e, prontu hotu ona ami hein hala’o”, tenik Alkatiri, iha Uma Fukun PN, Tersa (27/11).
Nia hatutan, Ró Haksolok oras ne’e daudaun seidauk bele hatún ba tasi tanba konstrusaun ninia fízika ne’e foin atinji 75%, falta 25% mak seidauk kompletu.
Kompañia ne’ebé hetan kontratu ho Governu Timor-Leste hafoin halo fali sub-kontratu ho emprezáriu seluk hodi halo konstrusaun ró iha área ida-idak hafoin selu, maibé to’o ikus kompañia hetan problema finanseira.
Prosesu la'ós to’o iha ne’e, Governu liu husi RAEOA selu ona advogadu atu haree prosesu ne’e tanba sira nia empreza iha ne'ebá mós problema boot. Tanba ne’e, sira atu halo Asembleia Jerál Emprezáriu nian atu foti desizaun.
Prosesu ne’ebé la’o hela ne’e atu evita de’it insubvensia tanba prosesu ne’e fó problema ba Timor boot liután.
Ho razaun hirak ne’e, Prezidente RAEOA hakerek karta ba Primeiru Ministru hodi nomeia ona Hermenegildo Pereira atuál Ministru Prezidénsia Konsellu Ministru atu akompaña prosesu ne’e.
“Ita tenke iha desizaun ida atu labele tau sasán hotu-hotu iha públiku, lae ne’e komplikadu liután tanba ne’e sei la mosu insubvensia”, dehan nia.
Alkatiri hatete, agora ne’e importante mak oinsá bele kontrola ró ne’e rejista ba Timor nia naran atu bele dada ba ne’ebé hodi konklui ka kontinua konstrusaun, maibé governu Timor mak kontrola fali kompañia ne’e.
