Diretór Ezekutivu Asosiasaun HAK, Manuel Monteiro hateten, Xanana bele hakiduk, tanbasá maka seluk-seluk ne’e labele sente-aan.
Tanba, bainhira Xanana rasik rezigna atu fó lisaun di’ak ba sidadaun sira atu bele aprende. Sai aman ba nasaun hodi bele tau matan bainhira oan sira la’o sala dalan bele hasé no bele dada oan sira mai dalan loos.
“Maun Xanana hatudu ona lisaun ne’ebé di’ak, tanba ne’e ita sei hetan naroman iha futuru mai”, dehan Manuel, iha sede FONGTIL, Kaikoli-Dili, horisehik.
Nune’e, nia mós kongratula lista membru governu ne’ebé sai ona, tanba partidu CNRT, PLP no KHUNTO iha duni kometimentu ba kompromisu polítiku ne’ebé sira halo iha kampaña atu kombate korrupsaun, hodi bele fó biban ba timoroan sé de’it maka iha tiha ona track record la di’ak iha povu ninia matan.
Iha fatin hanesan, membru sosiedade sivíl AJAR, Inocêncio Xavier hateten, bainhira lider antigu sira mak kontinua okupa pasta sira ne’e entaun ko’alia kona-ba kadernizasaun ne’e mamuk.
Tanba ne’e, maka nu’udar joven agradese ba vontade di’ak ne’ebé Xanana Gusmão halo sai modelu di’ak ba iha lider antigu sira seluk. Tempu ona atu entrega ba lideransa foun sira no lideransa tuan iha kotuk atu apoia.
Nune’e, Diretór Ezekutivu FONGTIL, Daniel Santos do Carmo hateten, Xanana rezigna aan ne’e hanesan ezemplu di’ak ne’ebé halo katak bele rezigna aan husi pozisaun atu fó oportunidade ba jerasaun foun sira kontinua.
Tanba ne’e, hanesan ezemplu ida ne’ebé jerasaun tuan, liu-liu ema veteranu ida hanesan Xanana ninia hatudu ona komportamentu di’ak iha boa governasaun ne’e katak se nia rezigna-aan ne’e gentleman espassu ba Primeiru Ministru bele hili fali ema seluk atu troka nia atu kontinua servisu.
Maibé importante maka tenke konsidera agora iha problema barak, saúde, infraestrutura ne’ebé tenke fó prioridade.
Tanba ne’e, sosiedade sivíl laiha ideia atu impoin ema ruma, maibé ema ne’ebé ideál ba sosiedade sivíl maka kapasidade, kompeténsia, profisionál, méritu atu halo servisu, tanba ne’e Estadu labele jere hanesan kompañia ka ONG de’it.
