Ne’e duni, Komisária Nasionál Direitu Labarik, Maria Barreto, husu ba inan-aman sira ne’ebé lori oan sira ba partisipa kampaña atu labele politiza mentalidade labarik sira nian.

Nia esplika katak, durante ne’e halo monitorizasaun ba iha kampaña eleisaun Parlamentár, komisaun haree labarik barak ne’ebé partisipa iha kampaña.

Nia dehan, iha motivasaun oin rua, ida tanba labarik iha konxiénsia rasik hakarak ba rona animasaun no komboiu partidu polítiku sira. Parte seluk, labarik sira ba tanba mobilizasaun -usi inan aman rasik ne’ebé envolve iha partidu.

Tanba ne’e, apoiante no militante husi partidu nian simu kamizola destribui ba labarik sira, entaun ikus iha loron kampaña ba partisipa labarik sira mós uza atributu partidu nian.

“Atu prevene situasaun ne’e ami husu, liuliu ba partidu polítiku sira oinsá atu bele fó avizu ba iha inan-aman sira no mós fó hanoin bainhira distribui atributu partidu ba iha apoiante no militante atu presiza fó hatene katak kamizola atributu partidu nian sei la fahe no fó ba labarik sira atu utiliza”, dehan Komisária Maria, iha servisu fatin, horisehik.

Nune’e, husu ba partidu polítiku sira bainhira atu halo kampaña presiza halo avizu ba iha públiku katak sei la fó oportunidade ba labarik sira atu hola parte iha kampaña laran.

Tuir observasaun no entrevista ne’ebé KNDL halo ba labarik sira katak, sira partisipa iha kampaña polítika ne’e tanba sira iha simpatia ba lider polítiku balun. Ne’e duni, hakarak atu mai hasai foto rona lider polítiku nia liafuan.