Padre Martinho Gusmão hateten, lider sira la onestu, la sinseru atu koloka. Ne’e duni dezde insiu hahú harii buat ne’e tanba la gosta malu, entaun ne’e moralmente mós ulun ne’e la funsiona.

Pesoalmente, tuir nia, bainhira iha ideia kona-ba remodelasaun hodi reajusta hotu ministériu sira ne’e presiza halo diálogu.

Tanba dezde insiu nia hateten ona bainhira rezultadu eleisaun mosu, loron primeiru iha Bekora hateten governu foun presiza konsensu nasionál bainhira laiha maka difisil atu funsiona ho normál hanesan agora daudaun ne’e.

“Ami sira ne’ebé independente la hali'is ba partidu, onestu no sinseru ne’e dalan maka imi gosta ka la gosta la'ós problema(…) tanba fó hatene ona dalan maka ne’e ba dalan seluk laiha ona”, dehan nia, iha Palasiu Prezidensiál Bairru-Pité, horisehik.

Entretantu, la’o ho konsensu nasionál aliansa espíritu Forum Maubisse ne’e la hamoris fila-fali. Iha Nicolau Lobato ninia tempu bainhira sei moris iha loron 20 Maiu 1978 repete liafuan unidade dala tolu. Unidade ideolojia, unidade organizasaun no unidade povu tolu, maibé situasaun agora lider sira la haree ba unidade ne’e.