“Dívida naun finanseira ne’ebé to’o agora ita la hatene totál ne’e hira? Nia-orijen halo nusa? Projetu sira ne’e eziste duni ka lae? Ninia kualidade ita la hatene to’o agora laiha informasaun ida ne’e maka ami preokupa tebes,” dehan Prezidente Bankada FRETILIN, Aniceto Guterres, iha Palasiu Prezidensiál Bairru-Pité, horisehik.
Nia hateten, Prezidente Repúblika mós iha preokupasaun hanesan kona-ba kualidade obra fíziku, maibé nune’e atu promulga OJE 2018 ka lae ne’e fila fali ba kompeténsia Xefe Estadu nian.
Nia esplika, kuandu Bankada FRETILIN hato’o informasaun ba Prezidente Repúblika kona-ba OJE 2018 ne’ebé aprovadu ona, hamosu diskusaun naruk tanba PR Lú Olo preokupa ho buat ne’ebé detalladu.
Maski nune’e, desizaun ba OJE 2018 ne’e direitu prerrogativa Xefe Estadu nian, ne’ebé atribui tuir Konstituisaun atu estadu orsamentu ne’e iha loron 30 nia-laran.
