Vise-Prezidente Bankada PD, Luis Mendes hatete, hafoin sira simu informasaun verbalmente husi husi sekretariadu konsellu administrasaun parlamentár, sira hatama ona patrimóniu parlamentu.

Nia hatutan, hanesan deputadu IV lejizlatura mandatu to’o bainhira mak remata seidauk hatene, maibé haruka atu entrega karreta no hahú aruma sasán hodi hein deputadu foun sira atu tama mai.

“Karreta ne’ebé ami uza ba servisu hatama hotu ona no livru iha plenaria ami hasai hotu ona hodi hamamuk fatin atu simu deputadu V lejizlatura”, dehan Luis, iha Uma Fukun PN, horisehik.

Ba karreta hirak ne’ebé eis-deputadu III lejizlatura sira balun seidauk entrega, la'ós kompeténsia bankada nian atu rekolla. Maibé, sekretariadu konsellu administrasaun Parlamentár nia kompeténsia atu foti medida.

Deputadu ne’e mós lamentavel ho aktu husi sekretariadu tékniku administrasaun Parlamentár nian ne’ebé halo buat ruma verbál de’it la liu husi karta formál ruma ba bankada atu bele trata asuntu sira ne’e.

Nia dehan, Deputadu IV lejizlatura sira atu sai husi ne’e presiza kompleta administrasaun ruma, ne’e presiza iha liña koordenasaun.

Iha fatin hanesan, Presidente Bankada Partidu CNRT, Arão Noe de Jesus hatete, sira seidauk simu karta verbál ruma husi sekretariadu konsellu administrasaun PN relasiona ho karreta sira ne’ebé deputadu IV lejizlatura sira uza ba halo servisu.