Antes ne’e, Primeiru Ministru, Mari Alkatiri, rasik la rekoñese bloku AMP tanba la iha legalidade.

Hataan ba kestaun ne’e, Prezidente bankada CNRT, Arão Noe de Jesus hatete, Bloku Koligasaun (BK) atu rekoñese AMP ka lae ne’e polítika sira nian atu bele espresa tuir sira nia hakarak.

“Atu rekoñese ka lae importante mak ami prienxe ona kritériu”, dehan nia, iha Uma Fukun PN, Sesta (17/11).

Iha fatin hanesan, Vise Prezidente PLP, Abel Pires hatete, iha Timor-Leste sé deit mak hakarak atu ukun, importante labele sai husi korredór konstituisaun, tanba sai ona biblia ka mata dalan ba sidadaun hotu atu la’o tuir.

Nia hatutan, halo jogada polítiku iha korredór konstituisaun ne’e baibain ona, primeiru ministru bele halo nia esteitmentu polítika hodi la rekoñese AMP, maibé labele mós viola Konstituisaun.

Maski situasaun polítika la’o iha nasaun ne’e la estavel, halo ema barak fó nia observasaun jurídika, maibé AMP nafatin fiar-aan hodi prepara governu alternativa hodi hein desizaun Prezidente Repúblika.

Antes ne’e, bankada opozisaun husi partidu tolu ne’e halo ona plataforma AMP hodi unifika forsa opozisaun iha Parlamentu Nasionál hodi sai alternativa governu.

Tuir Prezidente PLP, Taur Matan Ruak, iha konferénsia nasionál hatete, partidu opozisaun tolu atu sai forsa ida no lian ida hodi hasoru sitasaun iha tempu ne'ebé de'it.

Nia hatutan, harii partidu polítiku ne’e tenke prepara-aan hodi hodi ba ukun. Tanba ne’e, AMP tenke sai forsa ida, atu bainhira Prezidente Repúblika husu, prontu atu bele aprezenta hodi ukun.