Prezidente PN dehan, situasaun ne’e kuaze tinan tomak hanesan ne’e hela de’it. Laiha ona vontade atu hetan buat ruma ne’ebé di’ak. Ida-idak ho-nia pozisaun.

“Agora situasaun ne’e ita entrega ba Prezidente Repúblika. Prezidente Repúblika akompaña situasaun iha Parlamentu husi oras ba oras, husi loron ba loron, husi fulan ba fulan”, tenik Aniceto, iha Palásiu Prezidensiál, Bairru-Pité, Sesta (19/1).

Nia hatutan, bainhira halo plenária, deputadu sira buka maka insulta malu tanba deputadu sira loron-loron maka lee konstituisaun hodi halo interpretasaun tuir ida-idak nia matenek.

Nia esplika, iha Semana kotuk Parlamentu Nasionál laiha plenária tanba reuniaun lider bankada seidauk deside ajenda ruma.

Ne’e duni, nu’udar Prezidente Parlamentu Nasionál, lakohi atu inventa ajenda plenária nian tuir ninia hakarak. Maibé, tenke liu husi regra normál ho desizaun lider bankada sira.

“Ha’u boikota halo nusa? Meza komisaun sira maka kontrola hotu. Husi prezidente, vise-prezidente sira nian hotu, menus meza komisaun C nian maka prezidente deputadu FRETILIN nian vise-prezidente deputadu CNRT nian komisaun ida de’it”, tenik Aniceto.

Nia deklara katak, komisaun sira maka kontrola, bainhira la funsiona la'ós Prezidente PN maka impede servisu komisaun nian, menus plenária de’it maka la la’o komesa husi loron 8 Janeiru tanba seidauk iha ajenda.

Nia dehan, ajenda pendente iha rua, ida maka proposta destituisaun, maibé ida sei hein desizaun finál husi Tribunál. Ne’e duni, enkuantu desizaun finál seidauk labele ajenda.

Kona-ba mosaun sensura, marka ona ba loron 31 Janeiru. Restu ajenda laiha proposta ruma no ajenda seluk mós laiha.