Prezidente Komisaun Diretiva Nasionál AMP, Fidelis Magalhães Leite hateten, AMP sei la hakfodak ba juramentu karik atu halo iha foho Ramelau, tanba serimónia ne’e la’ós inventa maibé fé husi kultura Timor nian.

Tuir nia, antes Primeiru Ministru, Mari Alkatiri, sama-ain iha Palásiu Governu tenke halo serimónia rituál, nune’e CNE mós halo paktu Unidade Nasionál liu husi serimónia kulturál. Ne’e duni, juramentu Ramelau parte husi kultura Timor nian.

“Bainhira ita halo juramentu ita espresa ita nia vontade no ita nia hakarak ba ita nia rain, hodi kesi ho valór ne’ebé bei-ala sira husik hela,” dehan nia, iha Tribunál Rekursu, Kaikoli-Dili, horisehik.

Tuir nia, AMP rasik la hakfodak bainhira halo juramentu iha Ramelau tutun, tanba juramentu ne’ebé hala’o iha Ramelau sei fó benefísiu di'ak ba povu Timor-Leste.

Ne’e duni, Partidu Libertasaun Populár (PLP) prontu no konkorda ho deklarasaun Konselleiru Naimori bainhira lori membru Governu atu halo juramentu iha Ramelau tutun, hodi promete ba lulik nune’e serve nasaun ho di'ak.

Fedelis dehan, Timor-Leste idéntiku ho lisan ho kultura, tanba juramentu ne’e mós parte importante ba timoroan sé de'it. Nasaun ne’e idéntiku ona lisan, ne’ebé juramentu ne’e mós la’ós matéria foun bainhira AMP forma Governu.