Portavoz AMP, Taur Matan Ruak, iha Komisiu Publiku, iha Aileu hateten, Timor-Leste tinan lima dala ida hodi hili lider politika sira nuda’ar reprezentante povu hodi ukun nasaun Timor-Leste iha periodu ba periodu.

Nia dehan, tenki tau matan ba liman kukun fiskais sira, dala barak votu barak nulu ho amenta votu tanba fiskais sira mak manipulasaun iha buletin votu, ikus mai votu partidu balun hetan numeru aas no balun votu menus.

“Tenke tau matan ba ema sira ne’ebe liman kukun naruk, tanba dala ruma sira uza liman kukun halo kuak buletin de votus hodi hafalsu ema nia votu”, dehan nia, iha Kampaña AMP nian, iha Aileu, horisehik.

Taur hatutan, AMP preparadu ona bainhira atu ukun prontu halo fiskalizasaun no inspesaun ba votu sira ne’ebe akontese iha eleisaun tinan kotuk, hodi buka ema nauk votu ka lae, tanba deskonfia katak partidu balun hetan votu tanba mosu manipulasaun iha buletin votu.

Tuir nia, bainhira idetifika mak iha manipulasaun ba votu maka instituisaun Estadu sei lakon konfiansa tanba laiha krebilidade iha prosesu kontajen votu,  tanba mosu manipulasaun halo partidu balun lakon votu no balun amenta votu, nune’e partidu ne’e hetan vitoria hodi ukun nasaun ne’e.

Portavos AMP hateten, to’o oras ne’e seidauk konfirma ho CNE ho STAE tanba mosu informasaun katak STAE hamosu manipulasaun ba votu. Ne’e duni, bainhira AMP ukun sei halo inspesaun ba buletin votu iha tinan kotuk liuba.