Maski nune’e, dala ruma polítika governu ne’e sei difisil atu hetan apresiasaun husi Parlamentu Nasionál, tanba deputadu maioria ne’ebé hamahan-aan iha bloku Aliansa Maioria Parlamentár (AMP) hatudu ona sinál atu kontra polítika ne’e.

Prezidente Bankada KHUNTO, Luis Roberto hatete, tuir lei tenke aprezenta uluk programa governu hafoin aprezenta Orsamentu Retifikativu.

Tanba ne’e, kuandu governu mai aprezenta programa no Orsamentu Retifikativu dala ida de'it ne’e viola ona Konstituisaun.

“Kuandu sira mai aprezenta nafatin Orsamentu Retifikstivu no programa dala ida ne’e ami opozisaun sei vota kontra”, dehan Luis, iha Uma Fukun Parlamentu Nasionál, Sesta (27/10).

Iha fatin hanesan Prezidente Bankada PLP, Fidelis Magalhães hatete, Orsamentu Retifikativu ho programa ne’e buat ketak-ketak, tanba ne’e labele kahur asuntu rua ne’e hamutuk.

Fiar liu, tuir nia, ko’alia uluk programa governu. Kona-ba Orsamentu Retifikativu ne’e atu ajusta de'it orsamentu ne'ebé aloka ona iha tinan ida nia laran ne’e.

“Ita haree orsamentu tinan ida ne’e sei iha hela”, tenik nia.

Iha fatin hanesan, Prezidente Bankada FRETILIN, Francisco Miranda Branco hatete, Governu ne’e mai aprezenta Orsamentu Retifikativu ne’e la viola konstituisaun, tanba governu hala’o nia knaar hodi halo ajustamentu orsamentu governu nian ne'ebé aloka ona iha tinan ida nia laran.