“Durante tinan sanulu ne’e iha buat rua maka la la’o ka sala. Ha’u nia kompadre Xanana Gusmão dehan buat balun la’o la loos. Ha’u dehan, kompadre la'ós buat balun maka la’o laloos maibé buat barak maka la’o laloos”, dehan nia iha kampaña komísiu, iha Munisípiu Manatutu, horisehik.

Tanba ne’e, nia dehan, Governu FRETILIN mai atu servisu. Mai ho konseitu neen (6) para atu servisu lori dezenvolvimentu ba rai ne’e.

Tuir nia, estrada, edukasaun, saúde la di’ak. Se hotu-hotu la di’ak saida loos maka di’ak? Importante mak polítika. Tanba ne’e, FRETILIN fila hadi'a uluk maka polítika.

Nia dehan, hahú luta ne’e mehi buat ida atu liberta pátria atu liberta povu ne’e prinsípiu no valór FRETILIN nian, ne’e maka tenke ba fila hamoris fali liberta povu husi ki’ik husi mukit.

“Ukun povu tomak ne’e prinsípiu, dezenvolvimentu tenke iha balansu iha sosiál no ekonómiku ne’e halo parte polítika nasionál”, tenik nia.

Taur Sente Moe

Prezidente Partidu Libertasaun Populár (PLP), Taur Matan Ruak, sente moe bainhira haree kondisaun reál iha nasaun ne’e.

“Ha’u moe mai rai ida ne’e, tanba ukun-aan tinan 15 maibé Baguia nafatin nune’e hela de'it”, dehan nia, bainhira halo kampaña aberta iha Postu Administrativu Baguia, Munisípiu Baukau, horisehik.

Tuir nia, kondisaun ne’e akontese tanba fó konfiansa sala ba ema hodi kaer ukun. Ema sira ne’e dala barak hanoin ba sira nian-aan de'it hodi hariku sira nia família uma laran.

“Ha'u mai ho imi ne'ebé foun, partidu ne'ebé foun para ita buka justisa ba ita nia rain, justisa mak riku fahe, oportunidade fahe”, tenik nia.

Aleinde ne’e, lider PLP ne’e dehan, tama ona kampaña sira hahú halo kontratu ba veteranu sira hodi halo estrada.