Primeiru Ministru, Mari Alkatiri hatete, programa governu ne'e iha pilar haat importante hanesan Dezenvolvimentu Sosiál, Infraestrutura, Ekonomia no Modernizasaun Institusionál.

VII Governu ne'e sei fó prioridade ba programa iha área edukasaun. Komprometidu sei komplementa medida nesesáriu hodi asegura asesu hanesan ba labarik hotu-hotu iha eskola públiku. Konsentra iha kualidade edukasaun hodi hadi'a kurríkulu formasaun dosente no aumenta númeru eskola no sala ne'ebé disponivel ba estudante sira.

Governu ne'e mós hakarak halakon mal nutrisaun iha Timor, tanba ne'e governu komprometidu sei kontinua programa merenda eskolár.

Alkatiri hatutan, hakarak atu forma rekursu umanu hadi'a sosiedade timoroan nia kapasidade. Tanba ne'e, governu mós sei nafatin apoiu bolsu estudu ba joven timoroan atu asesu ba edukasaun.

Atu hasa'e kualidade ensinu, Governu mós sei kontinua servisu hamutuk ho Igreja Katólika no relijioza sira seluk iha Timor, atu bele servisu hamutuk atu bele garantia edukasaun ne'ebé di'ak liu ba timoroan tomak.

Alende ne'e, Governu mós fó prioridade ba setór saúde hodi hasa'e kualidade rekursu umanu ba saúde primária ho kualidade, garantia asesu efetivu no kualidade ba prestasaun kuida saúde, ne'ebé preventivu promosionál kurativu no reabilitasaun.

Nia kompromete sei hasa'e kualidade atendimentu medika espesializadu ne'ebé povu presiza iha ospitál.

Sei garante mós disponibilidade no distribuisaun ekilibrada ai-moruk ba sentru saúde tomak, atu pasiente sira labele sosa ai-moruk iha klínika privada sira.

Maski programa sira ne'e fó prioridade iha setór infra-estrutura bázika, maibé parte husi opozisaun partidu tolu hanesan CNRT, PLP no KHUNTO iha nia deklarasaun polítika la fó apresiasaun ba VII Governu nian.

CNRT konfunde

Membru Bankada CNRT konfunde ho programa Ministériu Turizmu no Ministériu Justisa nian, pasta rua ne'e seidauk iha, maibé programa VII Governu mai aprezenta ona.

Deputada Brígida Correia hatete, programa kada ministériu ne'e ministru ho nia estrutura mak produs programa hodi ba aprezenta iha Konsellu Ministru hodi elabora sai programa governu.

“Ita hotu akompaña to'o agora membru governu sira seidauk kompleta, sera-ke programa sira ne'e sé mak halo" dehan Brígida, iha Plenária PN, horisehik.

Tuir nia programa sira ne'e la estruturadu, koerente no halo opozisaun sira sai konfuzaun, tanba hare ba nia hakerek repetisaun ba-mai de'it.

Nia duvida tebes ho planu governu nian ne'ebé hakarak atu loke autoridade nasionál turizmu ne'e atu oinsá, loke kampu servisu ba timoroan ka ema estranjeiru ho saláriu ne'ebé boot.

Deputada ne'e lamenta, tanba ministru balun ho nivel estudu direitu kaer fali agrikultura no ema agrikultura kaer pasta rekursu naturais. Tanba ne'e, hanesan deputada iha uma fukun promete sei la fó votu konfiansa ba programa ne'e.

Hataan ba preokupasaun ne’e, Primeiru Ministru, Mari Alkatiri hateten, ministru balun seidauk iha maibé programa sira ne'ebé daudaun aprezenta ona. Programa ne’e halo husi unidade planeamentu no monitorizasaun ne'ebé iha gabinete primeiru ministru nian.

Prosesu produsaun programa governu ne'e produs husi asesór timoroan barak, la'ós mai husi asesór internasionál.

Nia hatutan, relasiona ho autoridade nasionál turizmu ne'e hanesan modernizasaun administrasaun atu lori Timor ba oin, ministériu sai hanesan modernizador no planifikador hodi modifika administrasaun.

Nia dehan, ema ne’ebé atu kaer pasta ruma iha estrutura governu labele haree liubá abilidade literária, maibé tenke haree moos sira nia servisu durante ne'e.