Asinatura Memorandum of Understanding (MoU) ne’ebé Parlamentu Nasionál halo ho ManipalHospital Malaysia, ne’ebé mosu pro-kontra iha instituisaun laran deskonfia nu’udar polítika ida hodi dezvia públiku ninia hanoin.

Tuir fonte kredivel husi Uma Fukun PN, desizaun atu halo akordu ne’e halo iha loron 24 Dezembru 2018, liu husi enkontru Konsellu Administrasaun Parlamentár, nune’e prosesu administrasaun hotu la’o tuir regra.

Bainhira asina akordu ne’e média publika no mosu preokupasaun makaas husi públiku, nune’e Prezidente PN, Arão Noe de Jesus, kria fali situasaun urjente hodi suspende akordu ne’e, maibé kontratu kontinua eziste.

“Kritika mai husi entidade barak, entaun Sekjer ho Presidente Parlamentu Nasionál….kontra malu hodi suspende MoU ne’e, atu dezvia públiku nia hanoin hodi labele kestiona tan asuntu ne’e”, tenik fonte ne’e, iha Uma Fukun PN, horisehik.

Sira dehan, pendente MoU ne’e tan de’it problema administrasaun interna PN nian, maibé la afeta ba ospitál ne’e la lójika, tanba akordu ne’e prosesu ida de’it hafoin bele konkorda malu hodi asina akordu.

Iha fatin hanesan, Prezidente PN, Arão Nóe hateten, problema agora ne’e la’ós ho ManipalHospital Malaysia, maibé problema administrasaun interna PN nian.

“Kontratu ho ManipalHospital Malaysia ne’e presiza hadi'a administrasaun iha interna Parlamentu foin bele implementa”, tenik nia.

Antes ne’e, iha loron (22/1), Prezidente PN deklara, tuir regra normál tenke aprova uluk akta, depois halo fali despaxu ida Presidente PN asina hodi autoriza Sekretáriu Jerál hodi ba asina akordu ne’e.

Dokumentu hirak ne’ebé atu legaliza prosesu ne’e laiha hotu, maibé bolu ona autoridade ospitál refere mai asina akordu ne’e bazeia ba saida? Problema ne’e administrasaun interna PN, nune’e sei buka solusaun tuir duni prosesu administrasaun nian.