Kampaña hala'o durante fulan ida tomak no sei deskansa iha loron 11 Maiu 2018 hodi kontinua ba votasaun iha 12 Maiu 2018.

Prezidente CNE, Alcino de Araújo Barris hateten, tuir prazu tempu ne’ebé CNE prepara durante loron 30 nia laran partidu polítiku sira tenke halo ona rejista, hafoin lori ba tribunál hodi hetan legalidade.

Nia dehan, atu konkorre iha eleisaun antesipada parlamentár maka Tribunál Rekursu hahú loke resjistrasaun ba partidu polítiku no lista kandidatura hahú loron 20 Fevereiru 2018 to’o 21 Marsu 2018.

Nia informa, partidu polítiku ne’ebé hakarak atu halo rejístu hodi hala’o atividade kampaña ba eleisaun antesipada, tenke reuni tuir kondisaun hafoin bele hala’o propaganda polítika.

“Partidu sira komesa ona halo rejista durante loron 30, kuandu hatama sira nia kandidatura maka foin bele hatene hira maka halo rejista atu tama kampaña”, dehan Alcino iha, hafoin edukasaun sívika ba estudante sira, iha kampus Fakuldade Siénsia Sosiais (FSS), Kaikoli-Dili, horisehik.

Nia hatutan, to’o oras ne’e seidauk iha informasaun loloos kona-ba númeru husi partidu hira maka halo ona rejistu iha CNE atu bele halo atividade kampaña polítika.