Xefe Suku Maubisse, Wilson Nivio Maria Pereira Mendonça hateten, sente kontenti tanba OXFAM no parseiru sira hili Rabilau sai hanesan fatin interkámbiu hodi realiza diskusaun aberta ho parte relevante sira hanesan governu no to'os na'in sira hodi hato'o sira-nia prekupasaun.
"Imi-nia prezensa sai parte ne'ebé bele apoia ami hodi hadi'a di'ak liután sitíu turistiku Rabilau ba iha futuru," dehan nia, iha Rabilau, horisehik.
Nia dehan, OXFAM ho parseiru sira-nia presensa iha Rabilau hanesan kontribuisaun ba hanoin no hadia fatin iha futuru sai fatin ne'ebé turizmu iha Timor-Leste.
"Imi-nia prezensa sai hanesan, parte ida ne'ebé bele kontribui hanoin ruma, bainhira imi husik hela iha fatin ida ne'e, nune'e ami komunidade iha Maubisse no Rabilau no mós bele hato'o ba Governu hodi servisu hamutuk atu hadi'a diak liu tan sitiu turistiku Rabilau iha futuru, hodi hatudu ba mundu katak Timor mós iha sitiu turista ne'ebé mak furak," tenik Wilson.
Nia informa, hanesan autoridade lokál no lori komunidade sira iha Rabilau kontente ho atividade sira hanesan ne’e, karik atividade sira hanesan ne’e bele realiza beibeik suku ne’e sai parte ida ne'ebe bele dezenvolve Munisípiu Ainaro Postu Maubisse, liu-liu iha area turistiku nian.
"Ida ne'e sai hanesan parte diak ida, ne'ebé bele motiva ita nia juventude sira liu-liu juventude kreativu sira ne'ebé mai ho inisiativa diak ne'ebe bele hamosu inovasaun oioin," nia informa.
Iha fatin hanesan Jestór ba Peskija no Influensia OXFAM, Adilson da Costa Junior hateten, agradese ba autoridade lokál iha Suku Maubessi bele simu sira ho kontente tanba ne'e OXFAM hanoin atu diversifika sitiu turizmu iha Timor-Leste.
"Tenke kontinua diversifika potensia ne'ebé ita iha, hanesan parte ida ne'ebé bele promove ita-nia potensia turistiku no poténsia agrikultór iha Maubisse, liu-liu iha Rabilau," dehan nia.
Adilson hatutan, parese ema barak hatene maibé iha ema barak mós seidauk hatene saida Rabilau iha, entaun foin rona de'it maibé bainhira mak ita atu dezenvolve.
"Ida ne'e mós sai oportunidade atu bele ajuda ita-nia komunidade, agrikultór no ita-nia joven sira iha ne'e atu kontínua promove katak Timor mós iha potensia oioin, la'ós deit iha Tutuala, Ataúro no iha munisípiu sira seluk," tenik nia.
Entretantu, interkámbiu refere hetan partisipa husi Governu hanesan sekretáriu estadu kooperativa, reprezenta sekretáriu estadu floresta, reprezenta sekretáriu estadu formasaun profisionál no empregu, reprezenta autoridade Munisípiu Manufahi, Polísia Nasionál Timor-Leste, Banku Nasionál Komérsiu Timor-Leste, no komunidade no parseiru sira seluk.
