Xefe Suku Madohi, Bernardino de Cristo informa, nia deside hodi hapara membru KPK iha Suku Madohi hamutuk na’in 80 hodi entrega hikas seguransa ba PNTL nia liman.

”Ha’u-nia KPK ne’e funsionamentu ativu ne’e kuaze 80 pesoas maibé ha’u hapara hotu ona hodi ida-idak nia aldeia tanba la hanesan uluk ona, tanba ami vitima barak ona,” dehan nia iha Parlamentu Nasionál, Kuarta (23/10).

Xefe Suku ne’e hatete, durante ne’e membru KPK sira ho inisiativa rasik esforsu hodi asegura seguransa iha suku laran, maibé laiha garantia ida ba sira.

“Ema sira ne’e iha patriotizmu no nasionalizmu hodi partisipa iha seguransa maibé sira laiha buat ida atu garante, nesesidade barak mak laiha atu garante,” dehan nia.

Tan ne’e, nia afirma, hahú iha semana tolu fulan ida ne’e, Suku Madohi entrega fila fali seguransa ba PNTL.

Ho nune’e, Xefe Suku Madohi hakat ba PN hodi hasoru komisaun relevante sira atu bele hato’o ninia preokupasaun.

Maibé, Xefe Suku ne’e la konsege hasoru tanba deputadu sira okupadu.