Iha Sabadu (08/08), Xanana hakat ba area Vila Verde hodi hasoru-malu ho komunidade sira iha area refere. Iha Vila Verde, Xanana kontinua ninia asaun hodi fó apoiu ba kbiit laek sira.

Xanana hatete, maske estadu TL fó ona subsidiu ba uma-kain sira relasiona ho Covid-19, maibé nia hakarak mós atu ajuda, liu-liu ba kbiit laek no desiente sira.

Eis Primeiru Ministru ne’e konta, nia hahú hanoin atu hala’o asaun karidade iha Timor laran tomak bainhira iha implementasaun estadu emerjensia dala tolu, komunidade barak mak lamenta tanba sira lakon sira-nia rendimentu.

"Problema boot iha mundu ne’e mak moras ida Covid-19. Ita liu tiha fulan tolu estadu emerjensia, iha momentu ne’ebá afeta mós ekonomia, no ami hahú halo misaun ida ne’e iha Dili nia rai loloon. Ami haree katak tanba sira labele tuun mai dan sira nia modo no aifuan sira,” dehan Xanana ba komunidade sira iha Vila Verde, Sabadu (08/08).

Aleinde ida ne’e, Xanana hatete, misaun karidade ne’e mós falun misaun seluk atu alerta nafatin ba komunidade sira iha Timor laran tomak kona-ba Covid-19.

“Atu alerta nafatin ba ema tomak katak Covid-19 ita bele la afeita maibé ita iha ameasa no perigu ida, nia bele mosu iha ita-nia rai laran,” dehan Xanana.

Lider karismatiku ne’e informa, nia ba to’o iha fronteira hodi haree mós komunidade sira ne’ebé hela besik area fronteira no aviza ba sira atu evita ajuda ema tama illegal iha fronteira.

Iha oportunidade ne’e, Xanana apresia komunidade Vila Verde ne’ebé partisipa iha asaun karidade ne’e tanba maioria uza maskra.

“Ha’u sente kontente tanba haree ema barak mak uza maskra maske ita rasik seidauk iha moras Covid-19, sorte boot no tenke agradese ba Aman Maromak iha as liu ne’ebá, ne’ebé hanoin hela ita, no mós ba ita-nia rai lulik ne’ebé lakohi ita atu hetan moras ne’e,” dehan Xanana.

Maske TL seidauk iha kazu transmisaun lokal ba Covid-19, maibé Xanana hatete, presiza kuidadu an nafatin, tanba familia balun ne’ebé hela besik iha TL hanesan Atambua no Kefa, bele tama mai no hadaet virus ba komunidade sira.

“Tanba ida ne’e mak ha’u husu, liu-liu ba joven sira tenke tau iha imi-nia ulun, buat ne’e la hotu, ita tenke alerta nafatin atu evita tiha moras ida ne’e,” dehan nia.

Xanana mós apoiu implementasaun Estadu Emerjensia dahaat, liu-liu atu taka fronteira nune’e ema labele tama no sai.

“Daudauk ne’e hasa’e fali ona rezolusaun katak ita tama fali ona ba Estadu Emerjensia ba dala haat, ne’e di’ak tebes ba ita, tanba kuandu sira loke dalan ou loke odamatan, ita sira iha ne’e bele mate hotu hanesan nehek.”

“Ita haree ba nasaun sira ne’ebé dezenvolvidu, Amerika, Europeia, Australia, mate hela de’it. Problema boot iha mundu ne’e mak laiha aimoruk ida atu bele kura moras Covid-19, matenek-nain sira sei buka hela,” dehan nia.

Tan ne’e, Xanana apela ba komunidade sira atu kontinua uza maskra hodi bele evita an husi Covid-19.

“Husu ba ita hotu tau iha ita-nia ulun katak nafatin uza maskara no tanba moras moras ida ne’e afeita husi ita-nia sistema dada iis, ita tenke alerta nafatin no hadook an husi moras ida ne’e.”

“Ita tenke rona autoridade, F-FDTL no PN, no mós Organizasaun Mundial Saude (OMS) sira atu bele prevene covid-19 ne'e,” dehan nia.