“Ita fila husi rate mai uma ita hotu tenki halo teste Swab,”apelu Xanana iha Sentru Izolamentu Vera Cruz, bainhira hein hela mate-isin atu lori sai ba uma, kinta (15/4).

Entretantu iha Domingu (11/04), Laboratoriu Nasionál Saúde deteta matebian Armindo Borges nia oan na’in rua pozitivu Covid-19, maibé to’o ohin loron autoridade sira seidauk foti pozitivu na’in rua ne’e hodi hatama ba ziolamentu.

Tuir observasaun jornal INDEPENDENTE, hahú husi Segunda (12/04) to’o kinta ohin (15/04), oan husi matebian Armindo ne’ebé pozitivu Covid-19 hamutuk ho lider nasional Xanana Gusmão hodi halo asaun iha izolamentu Vera Kruz nia oin.

Aleinde besik ho Xanana, oan husi matebian ne’e mós dala-ruma halo komunikasaun no halibur ho ema balun ne’ebé mai hodi fó apoiu ba sira-nia asaun.

Pozitivu na’in rua ne’e mós maske uza maskra maibé dala-barak maskra refere tara de’it iha sira-nia kakorok no dada hodi taka de’it sira-nia ibun, maibé husik sira-nia inus dada is ho livre.

Enkuantu, Xanana rasik dala-ruma hatun maskra no halo komunikasaun besik ho ema besik nia ka mai hasoru nia.

Ba kestaun ne’e, Vise Ministru Saúde Bonifasio Maukoli dos Reis hatete, autoridade sira seidauk foti pozitivu na’in rua ne’e tanba situasaun.

"Situasaun ida ne'e ha'u labele fó komentáriu, ida ne'e desizaun Konsellu Ministru mak atu bele deside mate atu entrega ka la entrega, nune'e mós matebian nia oan na’in rua pozitivu ne’e, ita hatene risku ne'e iha ona, ne'e ita iha situasaun halibur-malu ema barak, ita haree no rona de'it,"   dehan Bonifacio iha Aeroportu Internasionál Nicolau Lobato Komoro, Kuarta (14/04).

Molok ne’e, Ministra Saúde (MS) kestiona familia matebian na’in rua pozitivu Covid-19 kontinua livre hodi besik Xanana Gusmão, tanba lakohi koopera hodi ba izolamentu.

Ho preokupasaun hirak ne’e, molok karreta funerariu lori sai mate-isin ba familia matebian, Xanana aviza ona ba familia matebian, kompostu husi oan na’in tolu (3) no inan, inklui lider nasionál ne’e rasik atu halo teste swab hafoin remata prosesu funebre tuir tradisaun Timor nian.

Editor: Jose Sarito Amaral