Lider Nasionál ne’e to’o Iha aAreoportu Internasionál Nicolau Lobato iha 13:37 ho aviaun Zet PK-YGR ne’ebé oferese husi Indonézia.
Hafoin tun hosi aviaun Zet ekipa médiku hosi surtu COVID-19 halo kedan defektasaun hodi kumpre medida prevensaun Pandemia Global ne’e.
Tuir planu, Lider Rezisténsia no ekipa akompañamentu sei kumpre mós konfinamentu obrigatóriu liuliu auto Kuarentena durante loron 14.
Tuir observasaun Jornal INDEPENDENTE nota hafoin tuun hosi aviaun Eis Prezidente Repúblika, Xanana Gusmão ho kondisaun saúde estavél hodi sa’e kedan nia karreta 15.519 ba kumpre auto Kuarentena iha Residénsia Balibar tanba tuir padraun Ministériu Saúde Timor-Leste nian.
Too iha rezidensia BALIBAR ekipa Mediku ne'ebee akompana hosi Kordenadora Jeral COVID-19 Ministeriu Saude, Odete da Silva Viegas ho ekipa Mediku halo tan teste ba Xanana Gusmao ho rezultadu livre hosi COVID-19 no Xanana KONTINUA deskansa.
Entretantu, ekipa ne'ebe akompañamentu Xanana Gusmão hanesan Tomás do Rosário Cabrál, Jacinto Rigoberto, Elia Dos Reis Amaral, Alberto P. Carlos no Marcus da Silva mós sei kumpre konfinamentu obrigatóriu Iha Otel besik Xanana Reading Room, Licisidere ne’ebé hetan autorizasaun no koñesementu hosi Ministériu Saúde.
Veteranu Rezisténsia no lider Partidu CNRT mós hein Xanana Gusmão iha aeroporto ho sentimentu kontente tanba fila ho kondisaun estável.
Durante Xanana iha Jakarta, Lider Nasional uza mós oportunidade ba vizita Ministra Negosiu Estranjeiru Indonésia , Retno Lestari Priansari Marsudi hodi ko’alia kona-ba relasaun Timor Leste ho Indonezia. Liuliu kona-ba fronteira rai entre nasaun rua ne’ebé sei iha pontu balun pendente.
