Prezidente Partidu Demokrátiku (PD), Mariano Assanami Sabino hateten, aliansa foun haruka ona karta ofisial ba Prezidente Repúblika, maibé seidauk simu resposta ruma.

“To’o agora ami seidauk simu karta ofisial husi Prezidente Repúblika bainhira mak atu hasoru malu,” dehan nia, iha Sede PD, Kolmera.

Kona-ba kandidatu Primeiru Ministru, Assanami dehan, Kay Rala Xanana Gusmão, maibé prosesu hotu la’o hela agora tanba desizaun iha Prezidente Repúblika nia-liman.

“Membru koligasaun hotu-hotu hakarak maun boot Xanana mak sai Primeiru Ministru. Fofoun maun Xanana lakohi, maibé hotu-hotu apoiu entaun nia simu,” dehan nia.

Negosiasaun formasaun IX Governu, nia dehan, iha prinsípiu haat mak importante, ukun tenke alargada nakloke para bolu ema seluk bele tama, arriska-aan fó risku bainhira presiza hodi hakotu impase ne’e, laiha rezerva no la’o ho see de'it no ikus liu, bele hili atu bele atu hakotu impase ne’e.

“Ita ukun ne’e responsabilidade la'ós oportunidade. Partidu Demokrátiku kadeira lima de'it, tanba ne’e orienta ba kuadru sira atu labele hanoin ba Prezidente Parlamentu no Primeiru Ministru, la’ós atu aproveita kadeira,” dehan nia.

Kona-ba lista pendente, Asanami dehan, ne’e hanesan prosesu ida bainhira hasoru malu Prezidente Repúblika sei ko’alia hotu.

 Governu sei La Moris

Maski prosesu foun maka hahú, maibé Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri hateten, laiha konfiansa atu koligasaun foun ne’ebé lidera husi Partidu CNRT sei dura.

Hataan ba jornalista sira kona-ba Partidu CNRT lidera ona koligasaun foun hodi forma governu, nia hataan “Sei la moris”.

Entretantu, Konselleiru Másimu Partidu KHUNTO, José dos Santos ‘Naimori’ Bukar hateten, bloku koligasaun CNRT, PD, KHUNTO, PUDD, UDT, FM laiha negosiasaun, importante mak tenke iha sentidu governasaun hodi hakotu impase polítika rai laran.

“Koligasaun foun ne’e metin ka la metin ne’e ita fila ba ita-nia aan rasik, sai nu’udar lideransa ida iha esperansa atu forma governu tenke lori governu to’o rohan, la’ós ba kotuk hela de'it, oinsá povu nia moris ne’e di'ak,” dehan nia.

Tanba hamosu unidade nasionál mai husi ema hotu-hotu la'ós ema ki'ik ka boot tanba polítiku ne’e atu sai servidór.

Ne’e duni, Partidu KHUNTO iha esperansa iha badak Prezidente Repúblika sei Xanana Gusmão atu bele haree di'ak liután ba oin oinsá bele hakotu impase polítika ne’e.

 Ajenda Hasoru Koligasaun Foun

Entretantu, hataan ba karta ne’ebé koligasaun foun aprezenta ba Prezidente Repúblika, Xefe Kaza Sivíl, Francisco Maria de Vasconcelos hateten, Prezidente Repúblika simu ona karta koligasaun, tanba ne’e iha semana ne’e sei hasoru malu.

“Loron saida depois maka Gabinete Prezidente Repúblika fó sai,” dehan nia, iha iha Palásiu Governu, horisehik.

Konteúdu husi karta ne’e rasik Xefe Kaza Sivíl labele fó hatene sai, maibé iha duni karta husi koligasaun foun ba Xefe Estadu.