Alvu dahuluk mak tau matan ba labarik sira, daruak mak inan isin-rua no datoluk mak ba inan fó susu.

Tuir Diretór Jerál MSSI, Rui Manuel Expostu hatete, MSSI ho parseiru dezenvolvimentu sira konsentra uluk ba grupu alvu tolu hodi nafatin asegura katak labele iha ema ida mak mate tan hamlaha iha situasaun ida ne’e.

“Ami ho parseiru sira konsentra uluk ba ami nia grupu alvu sira liu-liu ba labarik sira, inan isin-rua no inan fó susu, hodi apoiu hahan nutritivu ba inan isin rua, inan fó susu no labarik sira ne’ebé ita haree katak sira presiza tebes,”dehan nia ba Online Independente, iha knar fatin MSSI, Kaikoli, kinta ohin, (29/04).

Nia akresenta, hahán nutritivu ne’e laos de’it fó ba labarik sira ne’ebé vitima iha Dili, maibé sira servisu hamutuk ho sentru Solidariedade iha munisipiu lima (5) hodi fó mós pakote nutrisaun ba sira, atu nune’e distribui ba labarik sira.

Hahán nutrivu ne’e fó ona ba labarik besik rihun 3 ne’ebé rekolla iha munisipiu 5 hanesan, Dili, Covalima, Likisa, Baucau no Ainaro.

Entretantu MSSI mós servisu hamutuk ho UNICEF hodi fahe manta, biti, gayung no buat sira ne’ebé ligadu ho nesesidade baziku ijéne nian, ne’ebé foka liu ba grupu alvu sira ne’ebé durante ne’e MSSI fó hela apoiu.

MSSI mós apoiu hodi fornese ona hahán tasak ba vitima dezastre naturál sira ne’ebé hela iha sentru evakuasaun.

Iha loron primeiru (04/04) bainhira akontese dezastre naturál iha proplema uituan tanba dalan sira ne’e nakonu ho bee no MSSI la konsege halo movimentasaun hodi identifika, maibé protesaun sivil ho parseiru dezenvolvimentu sira nafatin tun hodi halo observasaun hodi identifika.

Nune’e iha loron segundu, (05/04) MSSI komesa ona mobiliza fó hahán tasak uluk ba vitima sira ne’ebé hela iha sentru evakuasaun ne’ebé eziste iha Dili laran.

MSSI fó apoiu hahán tasak ba vitima sira ne’e iha loron dahuluk hamutuk rihun 7, iha loron daruak redus ba rihun 5 no loron da-toluk redus ba rihun 4.

Nune’e iha loron dahat MSSI redus ba 20, nune’e ho hanoin ida katak fó hahán tasak ne’e hodi fasilita uluk sira, atu nune’e buka sira nia problema.

MSSI liu husi Solidariedade Sosial Munisipiu Dili, servisu hamutuk ho diresaun jestaun risku dezastre iha Sekretariu Esatdu Protesaun Sivil (SEPS), identifika ona sentru evakuasaun ida ne’ebé bele fó hahan matak, atu sira mobiliza rasik hodi tein.

“Entaun ikus mai ita redus to’o iha loron lima ita la fó ona hahán tasak maibé fó deit hahán matak ba sira hodi sira bele mobiliza tein rasik.

Iha ne’ebá mós MSSI hamutuk ho SEPS no parseiru dezenvolvimentu sira komesa ona rekolla dadus, maibé dadus sira ne’e sai husi fontes ida ne’ebé bele partilla informasaun mak SEPS.

Nune’e SEPS ho MAE mak rekolla dadus vitima dezastre naturál sira ne’e.

Jornalista:Saturnina da Costa

Editor:Jose Sarito Amaral