Vitima inundasaun iha Dom Bosco Komoro, Octavio Amaral Pinto informa, fatin ne’ebé sira hela la seguru no mós nesesidade bazika menus.
“Difikuldade ne’ebé ami infrenta mak hela fatin no nesidade bazika loro-loron nian,” dehan nia ba Online INDEPENDENTE iha Dom Bosko Komoro, segunda (27/09).
Iha fatin ketak, vitima inundasaun Suku Manleuana, Marta Soares husu ba parte relevante atu responde ho urjensia, tanba haree ba situasaun iklima udan besik ona atu monu rai. Nune’e, lona ne’ebé sira hela la seguru no la aguenta ho udan.
“Ami husu ba estadu atende netik ami ba, tanba agora besik tempu udan atu mai,”informa Marta.
Enkuantu, total vitima inundasaun ne’ebé hela iha lona okos, iha fatin evakuasaun rua ne’e hamutuk na’in 76.
Husi numeru ne’e, uma-kain 41 iha Sede Suku Manleuana no uma-kain 35 iha Dom Bosko Komoro.
Tanba ne’e, vitima sira kontinua hein desizaun Governu nian kona ba harii bairu foun.
Entretantu, iha semana kotuk, Governu liu husi Ministeriu Justisa no Sekretariu Estadu Terras no Propriedades planeia ona atu muda vitima sira ne’e, ba iha bairu foun iha fatin tolu ne’ebé Governu prepara ona hanesan, Tibar, Hera no Beduku.
