Xefe Aldeia Anin-Fuik Franjelino Maia hatete, total lista naran vitima inundasaun husi Suku Kampu Alor, ne’ebé haruka ba Sekretaria Estadu Protesaun Sivil (SEPS) hamutuk 1.060, maibé naran sira ne'ebe taka sai atu hetan apoia ne’e hamutuk 887 no restante 182 laiha lista.

Enkuantu, iha Suku Kampung Alor iha Aldeia tolu mak hanesan, Aldeia Rai-Lakan 01 no Aldeia 02 Hamahon no mós Aldeia Anin-Fuik, maibé Aldeia ne’ebé afeitadu ba inundasaun seidauk hetan apoia ida husi Governu, ida ne’ebé la afeita ba inundasaun mak hetan uluk apoia husi Governu

“Ami desde dia 4 de-Abril akontese inundasaun iha Aldeia Anin-Fuik bairro Aitarak-Laran kuaze maioria afeita inundasaun hanesan bee tama ami nia uma, ami nunka hetan buat ruma husi estadu ida ne'e, Governu atu fasilita deit fós saka ida ba uma-kain ida mós to’o agora laiha, ho ida ne’e mak ami la satisfas,”dehan nia ba Online INDEPENDENTE iha nia residensia Aitarak-Laran Dili, kuarta (28/07).

Tuir nia, komunidade iha bairu Aitarak-Laran, Aldeia Anin-Fuik afeita makas ba korente bee ho volume ne’ebé bo’ot.

Nune’e, nia parte konfirma ona ho SEPS maibé laiha responde ida husi Protesaun Sivil.

Tanba ne’e, nia husu ba Governu liu-liu Protesaun Sivil atu responde netik vitima afeitadu sira nia prekupasaun durante ne’e.

Entretantu, iha sorin seluk Francisco da Costa, nudar vitima inundasaun mós deklara katak, desde akontesimentu inundasaun iha loron 4 fulan-Abril liu ba, to’o agora sira seidauk hetan apoia husi Governu.

“Ha’u hanesan negosiante kioske ne’ebé sai vitima mós ba inudadaun, iha momentu ne'ebé akontese udan bo’ot, estragus ha’u nia sasan iha kioske laran hanesan, jelera, fos, masin midar no sasan sira seluk, maibé to’o agora Governu nunka tau matan mai ami,”tenik Francisco.

Nia haktuir, sira priense hotu ona format husi Governu, maibé to’o agora seidauk iha rezultadu ida.

Asistente Editor: Saturnina da Costa