Vise-Ministru Transporte Komunikasaun, Inácio Moreira hateten, kualkér despeza públiku ne’ebé iha tenke liu husi kontratu ida. Tanba ne’e, tenke adopta tenderizasaun internasionál no tender tuir lei aprovizionamentu ne’ebé Timor iha.

Nune’e, investimentu privadu ruma tuir lei investimentu ne’e instituisaun relevante sira mak organiza hodi koordena-malu halo desizaun.

Tanba ne’e, parte MOPTK bele fó lisensa halo operasaun no halo jestaun ba aviaun hotu ne’ebé mai halo operasaun.

Tenke tau importánsia ba fatór tolu hanesan, rekursu umanu, lejizlasaun no infraestrutura iha rai laran.

“Iha posibilidade ita iha mós iha aviaun rasik. Ita sei halo planu ida ne’e ho didi’ak lai no tenke prepara rekursu umanu”, dehan Vise-Ministru, iha servisu-fatin, Sesta (27/10).

Governante ne’e dehan, kona-ba operasaun doméstika ninian laiha problema, tanba aviaun ZEEMS nian ne’ebé halo hela operasaun.

Nune’e, tinan oin mai sira hanoin atu dezenvolve tan aeroportu rejionál remata mak aviaun ZEEMS ho pasajeiru 42 bele halo ona operasaun.

Nia dehan, bele envolve mós setór privadu, maibé sira mós labele hanoin osan Estadu nian, tanba Estadu iha osan sei tau prioridade ba área sira seluk, maibé ne’e realiza entaun prepara osan depois loke tenderizasaun.

Iha fatin ketak, Deputadu Komisaun D PN, Francisco Branco hatete, atu sosa aviaun ne’e la’ós fasil, tanba tenke iha preparasaun masivu, nune’e sosa ona para atu utiliza.

“Ita sosa ona aviaun rasik ne’e ha’u sente di’ak, maibé presiza halo estudu ne’ebé kle'an. Tanba ne’e, ita nia aviaun entaun ita rasik mak jere la’ós uza ema nasaun seluk”, tenik nia.

Deputadu dehan, planu agora para sosa mai ona buat hotu preparadu, tanba durante ne’e aviaun kontratu de’it mak halo operasaun iha ne’e.

Nia espera TL iha aviaun rasik ona para bele hetan rendimentu ne’ebé barak, nune’e bele redús ona dependénsia ba mina.