“Ita fó omenajen ba feto no mane sira ne’ebé ho korajen, determinasaun no domin ba pátria, luta ba ita-nia liberdade no independénsia. Sira-nia sakrifísiu permite ita ohin moris iha dame, soberania no liberdade,” Mensajen Vise-PM, Assanami ba Komemorasaun Loron Nasionál Veteranus bá dala-IX, ne’ebé Media INDEPENDENTE asesu husi Média Gabinete Vise-PM, Tersa (03/02).

Vise-Primeiru Ministru Assanami haktuir, loron ida ne’e importante ba timor-oan hotu atu valoriza no respeitu, tanba veteranu sira mak sai memoria ba istoria Timor-Leste.

“Veteranu sira mak memória moris husi ita-nia istória no forsa morál ne’ebé inspira jerasaun foun sira atu kontinua hari’i nasaun ida ne’ebé justu liu, prosperidade no unidade,” Nia afirma.
Tanba ne’e, Assanami husu, atu hatudu respeitu ba sira-nia asaun la’ós de’it atu lembra pasadu-maibé atu assume kompromisu hodi proteje valores ne’ebé sira luta ba solidariedade, korajen, unidade no servisu ba povu.
Iha loron espesial ida ne’e, timor oan reafirma inia respeitu no agradese eternu no sei kontinua servisu atu garante katak legadu husi luta libertasaun nasionál sei preservadu no valorizadu.
“Ba ita-nia veteranu sira, ita hato’o obrigadu barak. Espíritu rezisténsia nafatin guia futuru ita-nia Nasaun,” Hakotu Assanami.