Vasina Ona Asu rihun 28 resin, Busa rihun 2 resin, Lekirauk 100 resin Featured

By Ekipa INDEPENDENTE Abril 11, 2024 268
Pesoal sira halo vasinasaun ba Asu. Foto:Google. Pesoal sira halo vasinasaun ba Asu. Foto:Google.

DILI: Tuir dadus husi Ministériu Agrikultura, Peska, Pekuáriu no Floresta, hahú husi fulan Janeiru to’o Abril, halo ona vasina ba asu 28.263 ka 57% iha RAEOA, Kovalima, Bobonaro, no Díli.

Ministru Agrikultura, Peska, Pekuáriu no Floresta, Marcos da Cruz informa, ho apoiu husi Governu Austrália halo ona vasinasaun ba asu iha Kovalima, Bobonaro, Díli, no RAEOA

Iha RAEOA vasina ona asu 7.334, Kovalima 4.424, Bobonaro 5.759 no Díli 10.856.

“Kuandu ita tau persentajen 57% ho totál vasina 28.263 ba animal asu,” dehan Marcos iha Parlamentu Nasional, Tersa (09/04).

Ekipa husi MAPPF mós halo vasina ba busa 2.538 no lekirauk 186.

Iha fatin hanesan, Ministra Saúde (MS) Elia dos Reis Amaral informa, hahú husi Setembru 2023 to’o Abríl 2024 rejista kazu asu tata ema hamutuk 64 iha RAEOA.

“Situasaun atuál iha RAEOA nian ho esforsu husi Ministériu tolu servisu hamutuk mak husi fulan Setembru to’o agora ita foin hetan iha RAEOA.  To’o horisehik iha kazu 61, to’o ohin dader ita hetan kazu 64 mak asu tata,” dehan nia.

Husi kazu 64 ne’e, kazu 10 liu mak rezultadu negativu, signifika laiha infetadu ba moras rabies ba umanu no sei hein rezultadu tuir mai ba kazu 50 liu.

MS husu labele haan naan Asu

Moras raiva hahú ona espaila iha terirotiu Timor-Leste. Kazu balun mosu ona iha Rejiaun Administrativu Espesial Oekusse-Ambeno. Tan ne’e Ministériu Saude husu ba sidadaun sira atu evita haan naan asu.

Ministra Saude (MS), Elia dos Reis Amaral hatete, atu evita hetan moras, liu-liu raiva, husu atu labele haan naan asu ka RW.

“Ita husu ba publiku atu evita haan na'an asu ne'ebe halo sai ba RW, nune’e labele fó impaktu ba ita-nia saude, liu-liu moras rabies ne'ebé sai kazu ba iha ita-nia rai,” dehan nia iha Parlamentu Nasional, Tersa  (09/04).

Iha Fatin hanesan, Deputada Bankada CNRT, Cedeliza dos Santos preokupa mós ho restaurante sira ne'ebé fa'an naan asu.

“Ha'u preokupa ho restaurante sira ne'ebé fa'an RW, inklui Timor-oan sira ne'ebé gosta haan na'an asu, serake sira hatene bainhira sira konsumu na’an asu kona moras rabies ka lae? ka asu sira ne'ebé kona ona moras rabies kuandu sira haan fó mós impaktu ka lae?,” dehan nia.

Rate this item
(0 votes)

Independente Digital TV