Embaixador Estadus Uniadus Amerika iha Timor-Leste, Kevin Blackstone hatete, USAID nia atividade Sustentablidade Sistema Saúde sei ajuda Ministériu Saúde, Institutu Nasional Saúde (INS) no instituisaun sira seluk, hodi dezeñu no maneja kualidade servisu saúde ne'ebé di'ak ba Timor-oan hotu.
“Ohin lansa atividade ida ho Governu Timor-Leste hodi ajuda garante katak Timor-oan barak bele iha asesu ne'ebé di'ak ba servisu saúde nian liu husi funsionamentu sistema saúde nasional ne'ebé di'ak,”dehan nia iha serimonia Lansamentu ba atividade sustentavel sistema saúde iha Ótel Novu Turismu, Lesidere Dili, sesta ohin (02/07).
Embaixador ne’e akresenta, USAID nia atividade ho millaun dolar amerikanu $15.6 sei foka ba dadus hodi informa desizaun no aumenta finanseiru ba saúde ne'ebé di'ak, ezemplu, prioritiza governu nia fundu ba kuidadu saúde no aumenta papel setor privadu nian no kompañia Seguru (asuransi) hodi hadi'a fasilidade no programa saúde nian. Ekipa projetu nian sei ajuda ofisiais sira hodi halo prosedura hodi rekruta no treinu profesionais saúde sira ne'ebé kualidade hodi servisu iha teritoriu Timor-Leste laran tomak.
"Sistema saúde ne'ebé forte importante tebes hodi nasaun bele prepara no apar ho pandemia no hasoru desafiu seluk ne'ebé parte saúde sira hasoru," tenik Kevin Blackstone.
Iha fatin hanesan, Ministra Saúde, Odete Maria Freitas Belo hatete, programa ba lansamentu ne’e, iha relasaun ho saúde nian ne’ebé
koalia kona ba haforsa sistema saúde no mós sustentavel.
“Prontu, durante ne’e hadia no ita koalia nafatin kona ba haforsa sistema saúde, maibé ita haree oinsa mak bele atu haforsa hodi substitui, tanba Ministeriu Saúde hanesan na’in ba saúde, nune’e sira labele servisu mesak, maibé sira konvida ita atu bele akompaña sira nian atividade no saida mak sira atu halo iha programa ida ne’e,”dehan Odete.
Tuir nia, Governu servisu hamutuk ho USAID durante ne’e kleur ona no sira nia atividade ne’e haree liu ba oinsa atu haforsa servisu saúde primaria nian.
“Ha’u hanoin ida ne’e iha ita nia planu estratejiku, ita sempre tau hanesan prioridade ba programa saúde primaria nian, nune’e ho sira nia apoiu ne’ebé iha la ses husi ita nia planu prioridade ne’ebé iha,”tenik Odete.
Entretantu, Governu Estadus Unidus Amerika, liu husi USAID, servisu hamutuk hanesan parseiru ho Governu Timor-Leste hodi apoiu baze no dezenvolvimentu ne'ebé efetivu.
Hahú iha tinan 2001, USAID fornese besik millaun dolar amerikanu $350 iha asistensia dezenvolvimentu ba Timor-Leste. USAID apoiu Timor-Leste nia esforsu hodi harii nasaun ne'ebé demokratiku, saudavel no prósperu liu husi programa ne'ebé haforsa kreximentu ekonomia ne'ebé inkluzivu no sustentável, espesialmente iha setor agrikultura no turizmu; hadi'a saúde povu Timor-Leste nian, partikularmente feto no labarik, no haforsa fundasaun ba boa governasaun iha area hotu ne'ebé marka iha Planu Estratéia Dezenvolvimentu 2013-2030 no sei servi ba nasaun bele reziliensia liu tan iha futuru.
Asistente Editor: Saturnina da Costa
