Asesora Asuntu Edukasaun Prezidensia Republika, Dulce de Jesus Soares hateten, iha programa tolu ba programa anual, programa dahuluk dezenvolvementu literária, daruak programa edukasaun sedu ba labarik sira no programa datoluk mak dezenvolvementu kualidade edukasaun enjerál.
Nia hateten, loron 30 Agostu, SE-GPR sei organiza programa ida ne'ebé nia títulu aprende liuhusi konta istória.
Nia esplika, iha programa ida ne'e, sei konvida autór sira ne'ebé esperénsia durante tempu rezisténsia, maibé sira mós barak aprende lee no hakerek iha tempu rezisténsia, no sira balun mós to'o ikus sai líder.
Nia haktuir, lider balun mak kontinua reforsa edukasaun durante tempu okupasaun Indonézia, mai to'o tempu ukun rasik an, iha balun mak sira nia envolvimentu iha rezisténsia boot tebe-tebes.
Nune'e, atividade aprende liu husi konta istória, hanesan meius ida atu kontinua reforsa kualidade edukasaun iha Timor Leste, ne'ebé haree katak ho dalan ida ne'e, estudante sira bele rona direitamente husi autór sira, ajuda estudante sira atu bele kompriende.
"Ami mós hetan apoiu orsamentu uituan husi UNICEF purvolta 12 mill dollares, mak ami uza hodi halo atividade, durante loron tomak,” dehan Dulce, iha Palasiu Prezidensiál, Bairru-Pité, Segunda (29/8).
Alende ne'e, estudante sira bele iha interasaun autór sira, iha momentu ne'eba hanoin katak informasaun sira ne'e sei metin liu tan, iha estudante sira nia hanoin kompara mós bainhira sira aprende de'it iha sala laran, ne'ebé dala sira tenke dekor istória sira ne'e.
Dala-ruma sira nia profesór mak tenke hanorin ba sira, entaun hili dalan sira ne'ebé simples, nune'e mós avontade liu ba estudante sira atu aprende.
Entretantu, atividade refere sei partisipa husi estudante purvolta 200 mak sei marka prezensa husi nivél báziku, 3 siklu no mós, nivél ensinu sekundária. No sei marka prezensa organizasaun sira hanesan Care Intesionál, fundasaun Alola, sala leitura Xanana Gusmão.
Nune'e, autór ida ne'ebé sei mós konta nia istória durante tempu rezisténsia, ho nia apoiu tomak ba dezenvolve edukasaun iha Timor Leste mak, Prezidente Repúblika José Ramos Horta, Padre Lokateli, Veterana Kasiana, Lafu husi Oekussi, Ministériu Edukasaun Juventude no Desportu Armindo Maia.
