Officer-in Charge of UNDP, Lazima Onta-Bhatta hatete, programa ne’e hahú implementa iha Aldeia 12 Outubru, tanba populasaun maioria afeitadu ba inundasaun foin lalais ne’e.

Enkuantu, programa ne’e hetan suporta finanseiru husi Governu Japaun no Korea ho montante orsamentu dolar amerikanu tokon $1.

“Programa ne’e implementa atu servi ba komunidade hirak ne'ebé afeitadu husi inundasaun,”dehan nia iha Aldeia 12 Outubru, Suku Comoro, segunda ohin (12/07).

Tuir planu, programa ne’e  implementa iha Aldeia 12 ne’ebé lokaliza iha Kapital Dili.

Entretantu, molok ne’e UNDP hamutuk ho Governu asina ona projetu refere ho fó oportunidade servisu emerjensia ba komunidade hodi rehabilita fatin sira ne’ebé hetan estragus.

Populasaun iha Aldeia 12 Outubru hamutuk 566, husi numeru ne’e feto na’in 285 mak sai benifisiariu ba programa ne’e.

“Sira ne’ebé hili bazeia ba kriteria ne'ebé oferese husi Governu hamutuk 566 mak selesionadu hodi servisu durante fulan ida, iha planu hakarak hili ema barak hodi partisipa maibé ho fundu limitadu fó  prioridade deit ba sira ne'ebé hetan afetadu makas husi inundasaun no vuneravel sira,”tenik nia.

Nune’e, bazeia ba planu servisu, UNDP oferese ona sasan servisu nian hanesan, gerobak, ensada, kanuru rai no aisar, ba komunidade sira uza hodi hamos bee dalan no Estrada.

Reprezentante Banku Dezenvolvimentu Aziatiku, Elsty Davidz Morato afirma lansamentu ba programa ne'e, konsidera hanesan programa traballu kontra remonerasaun ne'ebé sei kontribui no fó oportunidade ba komunidade sira bele hetan servisu imediata hodi rekupera fali sira husi dezastre naturais.

“Ajuda ida ne'e laos hakotu imi nia susar, maibé hodi hakman no fasilita problema ne'ebé imi infrenta,”dehan Elsty.

Tanba ne’e, nia husu ba komunidade sira atu servisu hamutuk ho  kompaña atu nune’e asegura fatin sira ne’ebé komunidade hela ba ho seguru.

Asistente Editor: Saturnina da Costa