Uma kain sira iha Dili ne’ebé seidauk hetan sira nia direitu ba subsidiu mak husi suku rua, kompostu husi suku Bairu-pite no suku Komoro.

Diretór Jerál MSSI, Rui Manuel Expostu hatete, durante Loron 15 hahú husi loron 9 too 24 Juñu prosesu pagamentu ba uma-kain hamutuk 11.289 mak halo reklamasaun seidauk simu subsidiu.

Tanba naran hirak ne’e laiha lista pagamentu.

"Naran sira ne’ebé laiha lista pagamentu sei halo reklamasaun husi suku no haruka mai MSSI hodi fó tempu loron 15 hodi verifika dadus sira ne’e hafoin halo pagamentu ba sira,"dehan nia iha salaun MSSI, Kaikoli, kuinta(25/06).

Bazeia ba jeneru benifisiariu sira ne’ebé representante laen no Xefe familia hahú loron 9 too 24 Juñu, feto atinji ba 19% ,mane 80,97% no seluk 0.01%.

Diretór ne’e mos husu ba benefisiariu ne’ebé ho salariu rendementu familiar liu $500 ba leten ne’ebé naran iha lista pagamentu iha suku ida-idak simu ona osan ne’e, halo favor ba ida-idak nia konsensia atu intrega fali osan ne’e ba Diretór MSSI munisipiu atu intrega fali ba banku BNCTL.