Projeitu dekretu lei ne'e aprezenta husi Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta do Santos.

“Intervensaun lejizlativa ne’e hala’o ajustamentu ba testu redasaun dekretu-lei ne’e, hodi evita dúvida ruma kona-ba sé mak sai benefisiáriu apoiu sosiál, ho nune’e reafirma fila fali desizaun hodi atribui subsídiu ba uma-kain sira hotu, ne’ebé halo ona rejistu to’o loron 28 fevereiru 2022, independentemente husi sira iha situasaun vulneravel ka lae? no mós independentemente husi sira iha membru balun ne’ebé fó atividade profisionál iha ámbitu administrasaun públika ka lae?,”dehan Ministru Prezidénsial Konsellu Ministru, Fidelis Leite Magalhães, iha Palásiu Governu kuarta ne'e (28/09).

Governante ne’e dehan, ba hirak ne’ebé hetan rendimentu ho valór boot, deside lakohi simu subsídiu ne’e, bele entrega hikas ba Governu ka fó apoia fali ba hirak ne’ebé presiza.

“Aplikasaun ne’e universál, katak hotu-hotu simu, signifika Prezidente Repúblika ka órgaun soberanu sira mós bele hetan hotu bainhira iha fixa família no rejistu, maibé ida-ne’e kabé ba ida-idak katak simu ka lakohi simu, lakohi simu mós la obriga, sé mak sente barak ona, lakohi simu fó fali ba maluk sira seluk ne’ebé presiza,” nia akresenta.

Enkuantu, Bazeia ba dekretu-lei númeru 37/2022, loron 25 maiu, artigu 2, hatete, benefisiáriu sira ba subsídiu ne’e hanesan uma-kain sira ne’ebé rejistadu ona iha livru rejistu uma-kain iha suku, iha teritóriu nasionál, tuir termu previstu iha diploma ministeriál númeru 49/2017, 23 Agostu.

Entrentantu, ba efeitu númeru anteriór, konsidera katak, hirak ne’ebé rejistadu ona iha livru rejistu uma-kain ne’e hanesan sira ne’ebé rejistu ona uma-kain no rejistu válidu to’o 28 Agostu 2022.