Enkuantu, matebian hakotu iis ho idade 97, iha Australia.
Tanba ne’e, Estadu no Governu Timor-Leste senti triste, lakon ona emprezariu no heroi diak ida ne’ebé durante ne’e, dedika an, hodi kontribui ba dezenvolvimemtu nasional no mós sai inspiradór ba joven timoroan sira hotu.
Prezidente Repúblika, José Ramos Horta no Primeiru Ministru, Taur Matan Ruak, hato’o sentidu kondolensia klean ba família Jape Kong Su, ne’ebé hakotu ninia iis, iha idade 97.
“Ha’u nia profunda sentida kondolénsia, ba família Jape. Timor-Leste lakon ema di’ak ida ne’ebé forte tebes no emprezáriu estraordinária. Jape Kong Su moris naruk. Nia husik hela riku-soin rohan laek ba nasaun no povu Timor-Leste,” dehan Prezidente Repúblika, José Ramos Horta, iha konta Facebook, tersa (27/09).
Entretantu, na’in ba Timor Plaza, Jape Kong Su, mate iha loron 26 Setembru 2022, iha Austrália ho idade 97. Tuir planu transladasaun mate isin mai Díli iha loron 6 Outubru 2022.
Jape Kong Su husik nia kaben Lai Min Ha, ho nia oan sira mak hanesan Julia, Ian, Kenny, Alan, Wendy, Tony, Connie, Danny no Pamela hamutuk ho nia bei oan sira ne’ebé durante ne’e sira moris hamutuk iha tinan 78.
Iha sorin seluk, Primeiru Ministru (PM) Taur Matan Ruak sente triste lo'os bainhira rona Jape Kong Su nia mate, matebian nu'udar fonte inspirasaun ba timoroan sira iha prosesu luta ba ukun rasik aan.
"Ha'u triste lo'os ohin dader rona avo jape mate ho idade 97 anos, durante moris nia sai fonte inspirasaun boot ba timoroan sira, liu-liu kria kondisaun finanseira ba timoroan sira ne'ebé iha estranjeiru iha prosesu luta ba ukun rasik-aan," dehan nia, iha Ministeriu Finansas, horisehik (27/09).
Nia dehan, hafoin Timor-Leste restaura indepedensia, matebian ho nia oan sira mai Timor-Leste hodi halo investimentu boot hanesan Timor Plaza hodi loke kampu serbisu ba timoroan sira barak tebes.
"Entaun ita lakon avo ida ne'ebé duante ne'e fo inspirasaun boot ba timoroan sira katak bele ba ne'ebé de'it, hetan saida de'it maibe nia rain ne'e, nunka bele haluha," dehan nia.
Xefe Governu dehan, tanba ne'e espera avo Jape nia oan sira bele lori nia espiritu ne'e bele hada’et ba timoroan sira hotu, tanba moris sira tenke ba buka moris iha estranjeiru maski sira-nia husar talin tara iha Timor-Leste.
Entretantu, tuir informasaun ne'ebé fo sai iha pajina Timor Plaza Dili Sentral, desezu ikus mak hakarak fila hikas no mai deskansa iha nia rai moris fatin ne'ebé nia hadomi tebes, Timor-Leste. Mate isin sei lori fila mai Dili iha 6 Outubru 2022.
Enkuantu, Familia Jape, sei fó hatene loron haloot mate isin bainhira termina ona data, nune’e sei fó sai ba Públiku.
