Eis Prezidente Repúblika ne’e hatete, nia kontra esbosu kriminaliza lei difamasaun ne’ebé ‘inisia’ husi Ministru Justisa Manuel Carceres tanba bele hamonu imajen Timor-Leste iha mundu internasional.

“Baihira ita lao ho lei kriminalija difamasaun sei hetan kritika maka’as husi mundu tomak, tanba sa mak halo fali ida ne’e, hela de’it tinan rua atu governu remata ona sira-nia mandate,” dehan Horta iha sede nasional RNDJK-RDTL, Kinta (23/07).

Tuir Horta, bainhira kriminaliza duni difamasaun sei difikulta sosiedade sivil, akademiku no komunidade sira atu halo kontrolu sosial no kritika ba estadu.

Tanba, nia dehan, iha buat barak ne’ebé pertense mós ba iha sosiedade sivil atu estuda no fó sira-nia opiniaun depois PR, PN no governu rona, karik la hasai sira-nia direitu no ema hotu iha diretu atu koalia.

“Kona ba lei difamasaun, ha’u hato’o ona ha’u-nia opiniaun, ha’u la konkorda no ha’u la fiar ida ne’e hanesan prioridade ida ba governu, iha dezafiu ida ne’ebé barak tebtebes iha oin, iha de’it tinan 2 nia laran orsamentu 2020 seidauk halo maibé tenke prepara mós Orsamentu 2020.”

Problema seluk, nia hatete, governu to’o agora seidauk ezekuta 100% duodesimu ka osan ne’ebé PN autoriza hodi foti husi Fundu Petroliferu.

“Se ita halo tan ida ne’e (kriminaliza difamasaun), ne’e hanesan distraksi boot, governu rasik lakon ona nia fiar no kbit hodi konsentra ba iha buat ne’ebé ita haree urijeten no prioridade duni,
 nia hatete.