Komandante UEP, Superintendente Xefe Afonso dos Santos hateten, UEP la hakfodak atu hasoru infiltrasun terrorizmu iha país ne’e. UEP iha Seksaun Anti Terrorista (SAT) ne'ebé preparadu ona kualkér tempu.

“UEP alertadu ona ho situasaun mak akontese iha país viziñu Indonézia. SAT hatene ona modus ne'ebé sai alvu terrorista nian”, dehan nia, iha Kuartél Jerál UEP, Bairru-Pité, hodisehik.

Afonso esplika, modus terrorista nian ne'ebé atu indika mak igreja, sentru komersiál, otél no kuartél polisia. Ne’e modus ne'ebé indika ka akontese ona iha país viziñu Indonézia.

Tanba ne’e, mak Komandu Unidade koloka ona SAT no servisu informasaun iha fatin indikadu sira ne'ebé kualkér tempu bele akontese asaun sira ne’e.

Aleinde ne’e, UEP mós hetan apoiu husi forsa defeza atu asegura modus sira ne'ebé sai alvu ba grupu terrorizmu nian. Ne'ebé, polisia no forsa defeza mós alertadu ona.

Nune’e, Komandante UEP ne’e husu ba komunidade tomak iha territóriu Timor-Leste. Kuandu hetan objetu ruma iha kualker fatin labele besik. Hadook-aan husi fatin ne’e hodi halo kontaktu ba polisia.

Nia akresenta, servisu sira ne'ebé UEP responsabiliza hetan ona orientasaun husi Komandu Jerál PNTL atu reforsa liu tan vijiblidade iha modus sira ne’e iha indikasaun ba alvu terrorista nian.

Servisu ne’e la'ós UEP mesak, maibé hetan koordenasaun di'ak ho Polisia Republik Indonézia (POLRI) Densus 88, Dansat Brimob Kupang, inklui BNN Atambua. Tanba ne’e, mak buat ruma ne'ebé atu akontese parte rua ne’e hatene ona no oinsá mak bele halo atuasaun.