Sekretáriu Estadu Protesaun Sivil (SEPS), Domingos Mariano Reis hatete, projetu seguransa no rezilénsia ne’ebé finansia husi fundu Europeu ba dezenvolvimentu ba dala-11 apoiu orsamentu hamutuk ho valór EUR 14, husi valór ne’e aloka ba TL hamutuk EUR 550,000.

Nia dehan, projetu ne’e hanesan kontinuasaun ida husi esforsu sira dahuluk ne’ebé hahú atu hamenus impaktu dezastre nian iha rejiaun ne’e. No projetu ne’e envolve ajénsia sira husi nasaun illa pasífiku 15.

“Hafoin asina MoU iha loron 4 Janeiru 2024, ami iha komprimisiu tomak atu implementa projetu BSRP II ho susesu. Inisiativa ida ne’e importante tebes atu hasa’e ita nia jestaun ba risku dezastre, harii rezilénsia multisetorál, no asegura partisipasaun inkluziva iha ita-nia esforsu atu kombate efeitu dezastre no mudansa klimátíka,” dehan nia iha Sala Gabinete APC Kaikoli, Kinta (29/02).

Sekretáriu estadu afirma, fundu ne’e apoiu liu husi MoU governu TL liu husi Ministeriu Interior, Sekretáriu Estadu protesaun sivil (SEPS), no Autoriedade Protesaun Sivil ho parseriu Uniaun Europeu, komunidade pasífiku ba projetu BSRP II ne’ebé ofosialmente lansa ona.

Projetu ne’e ninia objetivu atu hametin rezilénsia no preparasun dezastre sira iha illa pasífiku laran tomak, projetu ne’e hatudu komprimisiu unifikadu ida atu proteje komunidade sira husi dazefiu ne’ebé hamosu husi dezastre natural no mudansa klimátiku.

Reprezentante UE ba TL, Vise-Xefe Misaun, Christoph Sorg mos fahe ninian hanoin kona-ba inisiativa husi projetu, hodi refleta husi dezafiu neʼebé TL hasoru durante siklon tropikal Seroja iha tinan 2021 no fó ênfase ba projetu ne'e nia papel atu hametin rejiaun sira nia reziliénsia.

“Projetu BSRP II reprezenta ita-nia esperansa koletiva no rezillensia, ho objetivu atu hametin ita-nia preparasaun no resposta ba dezastre sira,” hateten husi Vise-Xefe Misaun ne'e.

Nia dehan, tanba rejiaun pasífiku sei kontinua hasoru ameasa barak liu-tan husi dezastre naturál no mudansa klimátika, lansamentu projetu BSRP II marka ona marco Ida-ne'ebé signifikativu no esforsu koletivu atu proteje no hasa'e reziliensia komunidade sira-nian.

Liuhusi parseria no kolaborasaun, Timor- Leste no ninia viziñu sira iha pasifiku sei haka'as an atu hamenus impaktu dezastre nian no asegura futuru ida-ne'ebé seguru liu ba jerasaun sira tuir mai.

Enkuantu, projetu nia ne’e sei realiza iha Munisípiu Vikeke no Covalima ho nia durasaun durante tinan rua hodi haree metigasaun prevensaun risku dezastre iha Timor-Leste ne’ebé nia indikadores rua hanesan ba komunidade sira husi aldeia to’o munisipiu no ba estudante sira husi primária to’o sekundária.