Motivu husi akontesimentu nee, vitima ba sosa sasan iha kios fila mai hakat liu dalan be nakonu iha estrada vitima sama kois, hafoin monu tun ba valeta laran no labele salva.

Nune'e, komunidade sira kontaktu kedas ba bombeiru mai hamutuk ho familia hodi buka tuir, kuaze oras haat nia laran mak foin hetan iha areia Aimeti laran, maibé la salva nia vida.

Tanba nee, matebian entrega kedas ba familia agora iha manleuana aldeia Mane mesak.

Aleinde, iha inundasaun nee rezulta mós kareta rua ho marka Carry, mout iha mota kasnafar, suku Manleuana, Postu Administrativu Dom Aleixo, Munisipiu Dili.

Hafoin akontesimentu ne'e, Sekretáriu Estadu Protesaun Sivil (SEPS), Joaquim Gusmão hatete, udan bo'ot ne'ebé akontese iha loron 29 fulan marsu nee, hamate labarik ida no kareta rua mak mout iha mota kasnafar inklui edifisiu públiku balun be'e tama.

“Alin ne'e nia isin mate konsege hetan fali, maibe 500 metru dook husi fatin ne’ebé vitima mout ba, tanba vitima nia isin mate ita entrega ona ba familia atu halo prosesu funebre,” dehan nia hafoin partisipa reuniaun Konsellu Ministru, iha Palasiu Governu, kuarta horseik  (30/03).

Nia hatutan, dadus provizoriu ne'ebé rejistu mak, labarik ida mout ba valeta laran ne'e no hetan ona apoiu emerjensia.

Enkuantu, kareta rua mout ne'e haruka ona ekipa atu identifika no mós edifisiu Prezidensia Republika nian, ekipa bombeirus hahú hamós hela.

Nia dehan, bainhira akontese, vitima monu ba esgotu laran, komunidade komunika kedas ba ekipa bombeirus, siguransa sivil, jestaun dezastre, CVTL, PNTL no komunidade halo operasaun buska konsege hetan fali vitima, maibé kondisaun la salva.

Nia afirma, kareta rua ne’ebé mout iha mota kasnafar, dadaun nee ekipa sei iha hela tereinu hodi rekolla dadus hodi bele hatene lolos konaba motivu, tanba nee dadus provizoriu hela. Tanba, ekipa sei iha hela tereinu hodi rekolla.

“Iha akontesementu udan boot nee, laiha vitima ida mak ita halo evakuasuan ba sentru evakuasuan sira, maibé iha dili laran kuaze bee sa’e, hanesan Tasi Tolu bee tama komunidade sira nia uma, maibé la grave hanesan tinan uluk,” katak nia.

Enkuantu, vitima nee parte ekipa husi sekretariu Estadu Protesaun Sivil (SEPS), fó ona apoiu umanitaria hanesan aihan, inklui mós apoiu kaixaun mai husi Ministeriu Solidaridade Sosial no Inkluzaun (MSSI).

Entretantu, vitima nee, nia aman naran Mario Muzinho no inan Fatima Lucia martins hela iha aldeia Mane Mesak, Suku Manleuana, Postu Administrativu Dom Aleixo Munisipiu Dili.