Enkuantu, objetivu husi programa nee mak, atu redus insidensia husi numeru pobreza no gravidade husi pobreza atu hadia saúde ou nutrisaun inan no labarik sira liu-liu ba labarik sira ne’ebé iha primaria infansia.

Atu nunee, bele reforsa sira hodi hetan hahan nutritivu  durante iha periodu infansia.

Tuir Xefe Scor Lead Apoiu MSSI, liu husi parseira dezemvolvimentu umanu USAID, Carmeneza dos Santos Monteiru, hatete, ba labarik sira neebé hafoin inan sira partus hahú husi tinan zero to'o tolu iha faze primeriu infansia nia valor subsidiu aumenta husi dolar amerikanu $20.

Nia dehan, subsidiu ho valor dolar amerikanu $20 ne'e, bainhira iha kazu adepsesional ruma, labarik ida moris mai ho kondisaun normal sei hetan direitu durante faze primeiru to'o tinan tolu no kontinua ba tinan neen.

"Maibe ba labarik balun moris ho kondisaun defisensia sei hetan adisional dolar amerikanu $10 no hamutuk $30 durante periodu infansia tinan tolu to'o tinan ne'en," dehan nia iha Ótel Timor, tersa horseik (29/03).

Nia hateten, objetivu apoiu subsidiu ba labrik ho kondisaun defisiensia ne'e,  atu inan sira lori nafatin ba sentru saúde bele kontrola sira no hetan imunizasaun kompletu, no subsidiu ne'e bele hola hahan nutritivu ba sira durante periodu infansia.

"Kona-ba labarik ho defisiensia sira sei hetan direitu subsidiu ne'e bainhira doutor ka enfermeira sira sei hare katak, labarik ne'e nia defisiensia, bele iha defisiensia fiziku, ou defisiensia husi moris kedas, ka defisiensia ne'ebé kontribui husi la han hahan nutritivu," tenik nia.

Nia hatutan, ba dahuluk labrik hotu-hotu iha tinan 6-0 mai kraik sira iha direitu asesu ba $20 kada fulan, bainhira labarik ida indetifika katak ho kondisaun defisiensia bele hetan tan adisional $10 nune'e hamutuk $30 dolar amerikanu.

Governu oferese subsidiu ida ne'e, tanba governu rekoñese katak, labarik sira ne'ebé ho kondisaun defisiensia persija tan rekursus humanu atu fó kuida ba sira.

Entretantu, Diretór Diresaun Nasional Asisténsia  Sosiál (DNAS) Lukas Tois, hatete,  iha programa nee sei fó mós subsidiu ba inan isin rua sira hotu, inklui inan sira neebé isin rua sedu.

Enkuantu, programa ne'e sei implementa hahú husi munisipiu tolu hanesan, Ainaro, Bobonaro no Regiaun Adminitrativu Espesial Oekusse Ambeno (RAEOA). Ba programa ne'e, sei hahú rejistu benifissiariu iha fulan abril ou julho tinan ne'e.