Diretór Jerál MTK, Gaspar de Araujo hatete, daudaun ne'e ministériu sei prepara hela relatóriu faze dahuluk nian hodi hatama ba Ministériu Finansas.

"Agora ami sei hein hela sira (operador kombustivel) hatama invoice mai, ami sei verifika hela relatóriu, ami hatama ba Ministériu Finansas depois mak ami husu fali orsamentu ba realiza produs Voucher ba faze segundu ho terseiru nian dala ida de'it," dehan nia ba Jornalista jornal INDEPENDENTE via telefone, Segunda (08/08).

Ba faze dahuluk, nia dehan, transporte públiku sira simu kombustivel litru 150, enkuantu ba faze tuir mai sei simu litru 300.

"Ha'u la promete fulan ida ne'e maibé sedu liu fim do mes, tarde liu inisiu Setembru tanba Konsellu Ministru prolonga tan loron 90," dehan nia.

Vouche Faze Dahuluk Invalidu iha Agostu

Iha parte seluk, kondutór Angguna diresaun Same-Fatuberlihu, Cintelino Amaral, preokupa voucher kombustivel ne’ebé nia simu invalid iha 1 Agostu.

Cintelino hatete, nia simu voucher ha 29 Jullu no foin uza iha 1 Agostu, maibé invalid ona.

"Ami simu subsidiu voucher ne’e iha loron 29 (Jullu), depois ba fali iha loron 1 (Agostu) ne’e kompaña la simu ona, dehan invalidu," informa Cintelino.

Relasiona ho kestaun ne’e, Diretór Diresaun Nasionál Transporte Terestre (DNTT), António da Costa hatete, bazeia ba dekretu lei númeru 18/2022 Voucher ba etapa dahuluk sei invalidu iha fulan Agostu.

"Bazeia ba lei ne'e hatete klaru hela to'o 31 Jullu voucher invalidu duni maibé ba oin ne'e ita sei hein hela depois mak ita haree fali tanba etapa daruak nian seidauk (fahe)," dehan nia.

Tuir nia, iha faze dahuluk bainhira DNTT fahe voucher, motorista sira tenke ba ense kedas iha estasaun kombustivel, labele hein fali.

"Tanba ne'e mak ami husu ba benefisiariu sira kuandu simu (voucher) ba ense lalais labele rai to'o hotu ona ita atu halo saida," dehan nia.