Deklarasaun husi MNEK ne’e relasiona ho sidadaun Timor-Leste na’in 21 ne’ebé hetan alerta husi autoridade Tailandia no Vietnam.
Tuir informasaun, Autoridade Aviasaun no Migrasaun Bangkok, Thailandia no Hanoi Vietname hasai alerta ba Autoridade Aviasaun no Migrasaun iha nasaun seluk atu labele simu sidadaun Timoroan na'in 21 tanba deskonfia Timoroan hirak ne'e la'o viajen ilegal.
Vise MNEK, Julião da Silva hatete, MNEK nia papel mak atu proteze sidadaun sira, tan ne’e bainhira hasoru problema tenke hakbesik an ba embaixada TL.
"Husu ba Timor-oan na'in 21 ne'ebé iha Tailandia halo favor hakbesik an ba ita-nia embaixada iha Tailandia atu ita bele hatene sira-nia problema, sira ba halo saida, kontratu iha ka la'e," dehan Julião ba jornalista jornál INDEPENDENTE hafoin partisipa seremónia atribuisaun medalla meritu ba soldadu Korea Súl na'in lima ne'ebé mate iha 6 Marsu 2003 iha RAEOA, iha salaun Xina, Segunda (08/08).
Molok ne’e, tuir karta alerta husi autoridade Bangkok ho númeru 08/2022 ne’ebé jornal INDEPENDENTE asesu horseik, ofisial ligasaun aerea no migrasaun Bangkok hasai alerta ba sidadaun Timor-Leste na’in 9 ne’ebé hala’o viajen husi Jakarta ba Londres no Lisboa deskonfia halo migrasaun illegal ba Europeia.
Iha karta ne’e hatete, iha 12 Jullu 2022 sidadaun Timor-Leste ne’ebé fahe ba grupu tolu koko atu hala’o viajen husi Jakarta via Doha ba Londres ka via Madrid ba Lisboa.
Karta alerta ne’e informa, grupu na’in tolu kompostu husi labarik mane ida ho idade tinan 10 ho naran Ivo Rene Mendonça de Jesus, foin-sa’e ida ho idade 18 ho naran Ercio José Maria, no mane ida ho idade tinan 30 ho naran Egidio de Jesus Soares.
“Pasajeiru hatene koalia uitoan lian Ingles. Sira-nia pasaporte foin hasai, no sira-nia intensaun atu ba hela fulan ida iha Reino Unido maibé lori de’it pasta kiik ida. Pasajeiru sira hatete sira ba vizita sira-nia familia iha Reino Unido maibé la konsege fó karta ka enderesu saida de’it. Sira laiha istoria viajen anterior signifika sira foin hala’o viajen dahuluk. Aleinde ne’e, sira laiha rekursu finanseiru ho forma cash ka kartaun kreditu hodi uza durante hela iha Europeia. Pasajeiru hirak ne’e mai ho perfil ne’ebé la di’ak,” deklara autoridade Bangkok iha karta ne’e.
Ba grupu daruak via Madrid ba Lisboa, karta ne’e informa tan, iha mane na’in rua, ida ho idade tinan 28 ho naran Olandino da Costa Fatima, no ida seluk ho idade tinan 25 ho naran Jenildo Bernardino Amaral.
Grupu daruak ne’e, karta ne’e hatutan, fó informasaun ne’ebé hanesan ho grupu dahuluk no mai ho perfil ne’ebé hanesan (la lori pasta, laiha osan, hela fulan ida).
Grupu datoluk, ho via Madrid Lisboa, kompostu husi mane na’in haat mak hanesan; Octavio Ricardo Pereira ho idade tinan 34, Clementino Soares ho idade tinan 36, Daniel Danacios de Jesus Soares ho idade tinan 25, no Estevao Amaral ho idade tinan 29.
“Grupu datoluk fó informasaun ne’ebé hanesan ho grupu 2 no mai ho perfil ne’ebé hanesan. Pasajeiru hirak ne’e hetan interseptadu husi viajen tanba sira-nia perfil ne’ebé la di’ak, bileti ketketak, no potensia risku as ba migrasaun ilegal ba Europeia.”
“Rede Internasional Immigration Liaison Officer iha rejiaun ASEAN foin lalais ne’e rekoñese aumentu númeru sidadaun Timor-Leste ho perfil la di’ak iha sira-nia viajen ba Londres no Lisboa. Laiha pasajeiru ida entre sira mak jenuinu pasajeiru no tanba ne’e deskonfia sira sei la fila bainhira tama iha Europeia. Pasajeiru ne’e iha posibilidade atu koko tan hala’o viajen ho aviaun seluk ba Europeia.
Iha karta ne’e, husu mós ba pasajeiru sira seluk no autoridade sira iha nasaun seluk atu karik hasoru ho pasajeiru hirak ne’e ka hasoru ho sidadaun Timor-Leste ho perfil ne’ebé hanesan iha viajen ba Europeia atu labele simu sira no fó lalais informasaun ba autoridade migrasaun internasional hodi bele foti asaun.
Iha karta daruak husi autoridade Hanoin, Vietnam, hasai lista Timor-oan na’in 12 ne’ebé deskonfia hala’o viajen illegal ba Europeia.
Informa katak sidadaun Timor-Leste na’in 12 deskonfia tama iha area Schengen ho ilegal. Sidadaun sira ne’e deteta iha aeroportu Singapura.
Timor-oan ne’ebé naran tama iha lista mak; Idelson Napoleao ho idade tinan 24, Rogerio Maia Pereira Ximenes ho idade tinan 23, Soltiano Maria de Lourdes ho idade tinan 30, Adelino Barreto ho idade tinan 36, Romaldo dos Reis ho idade tinan 30, Mercio Barros da Cruz ho idade tinan 21, Natalino Soares da Costa ho idade tinan 28, Natalino Sampaio dos Santos ho idade tinan 23, Urbano Pereira dos Santos ho idade tinan 20, Norberto dos Santos Gomes ho idade tinan 22, Antonio da Costa Gusmão ho idade tinan 28, no Felix Alves Cabral ho idade tinan 27.
“Ema hirak ne’e hala’o ona viajen iha grupu rua ne’ebé diferente no hatudu karta konvite. Atensaun iha karta refere letra iha kompozisaun ne’ebé hanesan no hatudu númeru telefone ne’ebé hanesan,” karta ne’e esplika.
Ho nune’e, autoridade Hanoin aviza atu atensaun ba grupu viajen ne’ebé konsidera nu’udar "Microstates" ne’ebé jeralmente livre viza maibé labele prova intensaun husi sira-nia viajen.
“Favor enkamina informasaun ne’e ba parte ne’ebé de’it ne’ebé karik iha interese legal hodi prevene sira-nia movimentu,” deklara autoridade Hanoi.
