Diretór Jeral MTK, Gaspar de Araujo informa, bazeia ba dadus provizoriu ne’ebé MTK iha, total transporte públiku ne’ebé rejistradu no iha direitu atu simu subsidiu kombustivel hamutuk 3.875, kompostu husi transporte terrestre 3.871, maritime 2 no aero 2.
“Aban (ohin) lista ne’e bele hatama ba Ministériu Petroleum no Minerais,” dehan Gaspar iha nia knar-fatin, Kaikoli, Kinta (28/04).
Ministru Transporte no Komunikasaun, José Agustinho da Silva hatete, Ministériu tolu sei halo hela diskusaun hodi prepara lista atu nune’e iha implementasaun labele mosu problema.
"Ita-nia ekipa ministeriu tolu sei finaliza (lista) tanba ita mós sei prepara lista klaru hela iha ne'ebá atu benefisiáriu sira ne'ebé mak hetan labele iha duvida," dehan nia.
Iha oportunidade ne’e, ministru husu mós ba transporte públiku sira hanesan mikrolete, taxi, bus no seluk tan ne'ebé rejista ona iha sistema baze dadus MTK atu labele hasa’e tarefa tanba iha ona solusaun.
"Ita tenke kontribui ba situasaun ne'e, signifika sira labele hasa’e tarefa, tenke normál nafatin, ida ne'ebé afeta ne'e mak governu buka solusaun," dehan nia.
Nia esplika, sei fahe bilete ka voucher ba benefisiáriu sira no bilete refere sei válidu durante fulan tolu nia laran, hahú iha Maiu to'o Jullu tinan ida ne'e.
Molok ne'e, Ministru Petroleu no Minerais, Victor da Conceicão Soares hatete, bainhira Prezidente Repúblika promulga Lei Subsidiu Kombustivel, liñas Ministeriál hahú konvoka reuniaun oinsa atu bele implementa.
"Agora daudaun ha'u ko'alia ona ho MAP, MTK mai par idaidak kontrola dadus ba nia setor rasik atu nune'e bele garante funsionamentu tuir diploma ministeriál ne'ebé aprova ona hodi ezekuta iha tempu besik, tanba ita hakarak lalais," dehan nia foin lalais.
