Nune’e mós, bainhira halo kobertura, labele ansi atu publika notisias sira ne’ebé seidauk iha konfirmasaun no seidauk hetan dadus.
"Ida ne’e mak sai hanesan ameasa boot ba jornalismu iha tempu agora, velosidade hanesan iluzaun, prátika ida kuandu ita lori kareta ka motor mak halai maka’as ita la hetan buat ida, maibé la’o neineik ita haree no aprende buat barak,”dehan nia ba jornalista sira, hafoin partisipa komemorasaun loron Liberdade Imprensa, ho tema “Jornalismu Iha Ameasa Dijitalizasaun” iha Salaun Delta Nova, tersa horseik (03/05).
Nia hatutan, ema sai eskravu (atan) ba velosidade hakarak to’o uluk molok ema seluk to’o, nune’e mós jornalizmu agora ho plataforma online dijital sira hakarak atu to’o lais mosu uluk iha públiku nia le’et, maibé ninia ameasa ne’e iha.
"Bainhira lais liu to’o iha fatin, sei la lori buat ida tan la iha faktus, la halo verifikasaun no la konfirma, informasaun sai fali gosip ka rumoris mak sai, entaun ba jornalista agora opsaun saida?, neineik to’o públiku lori diferensia liu husi faktus no dadus,” nia haktuir
Tanba ne’e, Prezidente KI, husu mós ba jornalista sira atu nafatin kaer metin kodigo etika jornalístika, bainhira hala’o sira knar iha terenu.
“Ita tenki mantein ho ita nia karakter ne’ebé diak iha públiku, atu nune’e públiku mós bele iha konfiansa hodi fó sai informasaun ne’ebé klaru no bele kualidade,”tenik nia.
Aleinde, nia dehan, jornalista nia knaar mak defende faktu iha situasaun saida deit, maibé jornalista mós presiza kontribui atu redus tauk no paniku iha sosiedade.
Iha fatin hanesan, Prezidente Timor-Leste Press Uniaun (TLPU), Candido Alves, husu mós ba jornalista sira atu hakerek notisias tuir kodigo etika jornalístika nian, nune’e labele hamosu konfuzaun iha públiku ou labele ofensa ema.
Entretantu, iha oportunidade ne’e, Prezidente Konsellu Imprensa mós hato’o parabens ba Jornalista sira iha mundu no mós iha Timor-Leste, ne’ebé kada loron 3 maio komemora Loron Mundial Liberdade Imprensa.
Iha serimonia komemorasaun ne’e, hetan partisipasaun husi estudante Universidade Nasional Timor-Leste (UNTL), MAPKOMS, Membru TLPU, AJTL no mós Jornalista sira.
