Responsavel Enfermeira iha Postu Saúde Leohitu, Maria Valentino Colo hateten, difikuldade ne'ebé durante Postu Saúde Leohitu mak transporte atu apoiu ba mai hodi hala'o atividade servisu saúde nian, inklui estrada ne'ebé kondisaun grave tebes satan iha momentu udan.
“Entaun, pesoal saúde sira husi sentru saúde no mós husi postu saúde atu desloka ba mai ne'e susar tebes, tanba transporte no mós estrada ne'e, kondisaun ladiak duni,”dehan nia ba Online INDEPENDENTE iha knar fatin, sabado (15/10).
Nia hatutan, atividade ba programa SISKA, pesoal saúde sira seidauk bele hala’o tanba vasina Covid-19 ne’e difikulta tebes, aleinde ho kondisaun ne'ebé limitadu tebes pessoal sira halo atividade ida husik atividade importante seluk.
Enkuantu, Suku Leohitu ne'e rasik, iha aldeia lima ne'ebé depende hotu de'it ba postu saúde ida, komunidade ne'ebé atu ba asesu saúde mós susar tebes, tanba aldeia hirak ne'e dook husi postu saúde, liu-liu aldeia Aiasa, Raiulun no aldeia Faloai.
“Aldeia sira ne'e maka susar tebes atu asesu mai postu saúde no tuir atividade ba programa SISKA ne'ebé kada fulan realiza dala ida, iha Sede Suku Leo-hitu " hato'o nia.
Tanba ne'e, responsavel ne'e hato'o, atu fasil liu komunidade sira asesu ba programa ne'e mak, postu saúde iha hanoin oinsá lori programa ne'e ba sira nia leet, maibé tuir nia difikuldade ne'e mak nafatin transporte.
" Ita atu lori programa ne'e ba komunidade sira, atu sira bele asesu, maibé iha nia difikuldade ne'e mak nafatin transporte," nia subliña.
Iha sorin seluk, Xefe Suku Leohitu, Benjamin Maia hateten, iha Suku Leohitu ne'ebé kompostu husi aldeia lima ne'e postu saúde ida de'it, entau komunidade sira husi aldeia Aiasa no Raiulu ne'e mak susar atu asesu.
"Ita nia difikuldade seluk mós rekursu humanu ba pessoal saúde iha postu ne'e rasik sei menus tanba ita haree aldeia lima kedas mak asesu ba fatin ida de'it, maibé ita atu halo oinsá ita nia nasaun maka nune'e," hato'o nia.
Tuir nia haree programa SISAK durante ne'e failla tanba ne'e husu ba Ministériu Saúde atu bele reativa fila fali atividade ne'e nune'e inan isin rua sira ne'ebé hela dook bele fasil no halo tratamentu rutina.
Aliende, nia dehan, kona ba estrada, Timor-Leste ukun aan tinan 20 ona, maibé komunidade suku Leohitu sei preokupa nafatin ba asesu estrada ne'ebé tempu udan sempre sai dezafiu boot ba komunidade.
Enkuantu, total populasaun iha Suku Leohitu ne’ebé kompostu husi Aldeia lima, hanesan, Aldeia Aiasa, Faloai, Ferik Katuas, Mohak no Raiulun, hamutuk 4.432, no familia uma kain hamutuk 936.
