Nune’e, hodi fó rekuñesementu ba kontribuisaun jornalista sira nia iha prosesu ukun-an.
Presidente Konsellu Impresa (KI), Virgilio Guterres hatete, KI ho Centro Chega halo parseria ho Autoridade lokal Munisipiu Bobonaro nian, realiza atividade pertinente ida hodi komemora trajédia Balibo ne’ebé akontese iha loron 16 fulan-Outubru tinan 1975.
Trajédia ne’e rezulta jornalista Australianu na’in lima mate bainhira hala’o misaun lulik jornalizmu nian hodi tranzmite lia-loos kona-ba planu invazaun militar Indonézia nian mai iha territoriu Nasional Timor-Leste nian.
Enkuantu, Jornalista hirak ne’e mak; Greg Shackleton, Gary Cunningham, Tony Steward husi Channel 7, Reporter Malcolm Rennie no Brian Petersen husi Channel 9.
“Prinsipalmente, atividade konjuntu esensial ida husi Kl no Centro Chega ne’ebé realiza dialogu komunitaria atu promove Balibo nu’udar “sidade Liberdade”, dehan nia iha ambitu komemorasaun loron Balibo Five ba dala-46, iha Balibo, sabado ne’e (16/10).
Nia hatutan, atu promove loron 16 Outubru nu’udar loron nasional liberdade imprensa no liberdade espresaun nian nudar rekuñesimentu ida ba jornalista Australianu na’in lima no jornalista sira seluk ninia kontribuisaun ba Timor-Leste ninia independeénsia liu husi misaun jornalizmu.
Nune’e, iha loron 14 fulan-Outubru KI no CNC, realiza ona dialogu komunitaria hamutuk ho autoridade lokal Munisipiu Bobonaro, espesialmente ho autoridade lokal Postu Administrattivu Balibo.
Iha dialogu ne’e partisipa husi reprezentante sira entidade hanesan veteranu, organizasaun estudantil rezisténsia, xefe suku sira no seluk seluk-tan.
Iha dialogu refere deskuti sekuensia historiku hirak ne’ebé refleta Balibo nia historia pasadu ba luta libertasaun nasional, hahú husi forte Balibo, tragedia Balibo 5, Deklarasaun Balibo, invazaun 7 Dezembru no exodus Setembru 1999.
Enkuantu, iha Dialogu mós diskute elementu sira importante balu atu lori Balibo ba futuru hanesan sidade liberdade iha Timor-Leste.
“Elementu importante sira ne’ebe sei garante Balibo ba sidade futuru liberdade mak, promove Balibo atu sai distinasaun turismu istoriku, promove interkambiu sosiu kulturál no politika, promove interkambiu ekonomia no promove estabilidade seguransa iha fronteira,”nia haktuir.
Nune’e, refleta ba sikuénsia historiku Balibo nian ba luta libertasaun nasional, refleta ba dezenvolvimentu ne’ebé integradu ba Balibo iha futuru no refleta mós ba reportajen Greg Shackleton nian antes nia mate, “from unnamed village which will be remember in Portuguese Timor’.
Ho nune’e, atu transforma Balibo husi knua naran laek ba Balibo Sidade Liberdade mak KI ho CNC rekomenda atu deklara loron 16 fulan-Outubru nudar loron Liberdade imprensa.
Tanba ne’e, atu alkansa objetivu ne'e Konselho e Imprensa ho Centro Chega hamutuk ho Autoridade Munisipiu no autoridade loka no lider komunitaria Balibo nian sei hala’o asaun sira mak, kontinua halo asaun ba oin hodi halo peskiza narativa kona-ba sekuensia konseitu Balibo Sidade Liberdade, halo advokasia no intensiva kampaña Midía, Dialogu ho lider nasional sira, partidu politiku, autoridade munisipal no autoridade lokal sira iha Balibo.
Konseitu Balibo Sidade Liberdade ne’e, KI ho CNC halo rekomendasaun ba Governu atu determina liu-husi dekretu ka rezolusaun governu nian hodi kontinua promove kultura diskusaun entre autoridade Munisipiu Bobonaro kona-ba konseitu dezenvolvimentu Bobonaro ne’ebé estratéjiku no sustentavel.
Asistente Editor: Saturnina da Costa
