Xefe Suku Hatudara, Manuel Ximenes hatete, populasaun iha Aldeia rua ne’e mak hanesan, Aldeia Hatubuti ho Aldeia Tuturema, ne’ebé lokaliza iha parte foho, Suku Hatudara.
Nia esplika, populasaun sira ne’e durante uza bee, kuru deit husi bee matan, maibé bee matan refere dook husi sira nia hela fatin.
Aleinde, iha tempu bailoron bee matan komesa maran no laiha bee atu populasaun sira kuru.
“Durante tempu naruk nia laran, hahú iha okupasaun Indonezia iha Timor-Leste to’o ukun-an, populasaun iha Aldeia rua iha suku refere la asesu ba bee moos,”dehan nia iha ambitu komemorasaun loron Balibo Five, iha Balibo, sabado horseik (16/10).
Tuir nia, populasaun sira iha aldeia rua ne’e hela iha parte foho leten, nune’e bee moos husi bee matan iha fali karaik ka foho okos, ho ida ne’e, sai prekupasaun ba boot ba sira.
Tanba ne’e, Xefe Suku husu ba Governu bainhira iha programa atu halo instalasaun ba liña eletrisidade iha suku refere, bele fasilita mós makina sanio no kanu ba populasaun sira atu nune’e bele dada bee hodi sae ba sira ida-idak nia uma iha foho leten.
Xefe Suku espera iha tinan 2022 mai, bele iha mudansa ba populasaun sira iha suku refere, bele asesu ba setor hotu.
Enkuantu, total populasaun hamutuk rihun 2.125 kompostu husi Aldeia Hatubuti iha uma-kain 102, Aldeia Tuturema iha uma-kain 82, Aldeia Nuapu iha uma-kain 127 no Aldeia Biatehu iha uma-kain 152.
Asistente Editor: Saturnina da Costa
